د سره صلیب نړیوالې کمېټې مسوولینو هلمند ولایت کې د یوې خبري ناستې پر مهال د خپلو فعالیتونو په تړاو مالومات وړاندې کړل.
د یادې کمېټې مسوولین وایي، تېرکال یې ټول هېواد کې ۲۱۵ زره ناروغانو ته په بېلابېلو برخو کې خدمات وړاندې کړي چې له ډلې یې شاوخوا ٣٥ سلنه ښځې او٤٠ سلنه ماشومان دي .
دوی همداراز وايي، تېر کال په ټول هېواد کې یې ۳۴ زره مصنوعي روغتیایي وسایل هم جوړ او اړمنو ته ورکړي دي.
هلمند کې د سره صلیب کمېټې مسوول سیواکګن وايي: « موږ تېرکال په ټول هېواد کې ۲۱۵ زره ناروغانو ته د سره صلیب په ولایتي مرکزونو کې بېلابېل خدمات وړاندې کړي چې ۳۵ سلنه يي ښځې او ماشومان دي او له دې جملې له ۱۹زرو زیاتې یې تازه پېښې دي. موږ همدا راز په تېر کال کې ۳۴ زره کسانو ته مصنوعي او ارتوز وسایل هم جوړ کړي دي.»
د سره صلیب نړیوالې کمېټې له لوري په هلمند معیوبینو او معلولینو ته مصنوعي غړي او اندامونه جوړیږي او د دغه شان ډېری ناروغانو د ژوند هیلي بېرته ورسره ژوندۍ شوې دي.
ناروغان له دې خدمتونو خوښي ښیي او وایي، هېواد کې د دا ډول مرکزونو شتون یو ستره اړتیا ده؛ ځکه په خبره یې دوی اړ نه دي چې بهر ته د درملنې لپاره لاړ شي.
د ضیاالحق په نوم معلول وايي: « زما پښه پرې شوې، له دې وړاندې مې پښه په پخواني قالب کې آزاده شوه او اوس یې راته بله پښه جوړه کړې.»
د جانان په نوم یو بل معلول وايي: « مخکې مې ژوند ډېر سخت و، اوس خوشاله یم چې له خپل بدن د سپورټ لپاره هم کار اخلم، زه له دې خلکو ډېره مننه کوم.»
عبدالولي وايي: « معیوبين ډېرو مرستو ته اړتیا لري، د دې موسسې دې کور ودان وي چې موږ ته یې د تمرین او سهولیت ځای برابر کړی. زه خلکو هیله لرم چې ټولنه کې له معیوبینو سره ښه چلن وکړي؛ ځکه د معلولو کسانو زړه ډېر نری وي.»
د سره صلیب نړیوالې کمېټې د مالوماتو له مخې، هلمند کې یې په ٢٠٢٤ زېږدیز کال بېلابېلو معلولینو ته ۳۹۳ مصنوعي غړي برابر کړي چې له ډلې یې ۲۲۹ د ماین چاودنو یا جګړو له امله معلول شوي وو.
