د حکومتي ادارو د یو کال لاسته راوړنو د تشرېح په لړ کې د چهارشنبې پر ورځ د سرې میاشتې ټولنې خپل راپور له رسنیو سره شریک کړ.
د افغاني سرې میاشتې ټولنې چارواکي وایي، تېر کال يې د هېواد پر کچه پر څه باندې ۴ میلیونه ۶۹۰ زره کسانو د نغدي مرستو د وېش ترڅنګ، خوراکي او غیري توکي هم وېشلي دي.
د دوی په خبره، یادو کسانو ته د روغتیا، سرپناه، د څښاک اوبو چمتو کولو او نورو برخو هم اړین خدمات وړاندې کړي دي.
خو په دې سربېره هم چارواکي دغه مرستې کافي نه بولي او وایي، پر رسميت د سرپرست حکومت نه پېژندل کېدو له امله له افغانستان سره د نړيوالو بشري مرستې کمې شوې دي.
دوی له مرستندويانو غواړي چې خپلې مرستې سياسي نه کړي.
د افغاني سرې میاشتې ټولنې مرستیال عزیز الرحمن وايي:« موږ له هغو ټولو ادارو چې له افغاني سرې میاشتې سره مرستې کوي، تل دا غوښتنه کړې چې سرې میاشتې ته د سیاست له کړکۍ ونه ګوري بلکې دا یوازې بشردوستانه خدمتونه وړاندې کوي او له سیاست سره هېڅ تړاو نه لري. دا جلا موضوع ده چې د افغانستان رسمیت پېژندنه تر اوسه پورې د تعلیق په حال کې ده، خو زموږ په سفرونو یې اغېز کړی او زموږ د مشر په ګډون یو شمېر چارواکي په تور لېست کې دي.»
د افغاني سرې میاشتې ټولنې عملیاتي معین روح الله عبدالسلام وايي:« همدارنګه افغاني سره میاشت پر نړیوالو غږ کوي چې بشري خدمات باید د سیاست ښکار نه شي.»
افغاني سرې میاشتې ټولنې تېر کال په تورخم، نیمروز، کندهار او د هرات په اسلام کلا کې د راستنېدونکو کډوالو لپاره ځانګړو شویو پنډغالو کې له ۳۳۵ زرو ډېرو راستنو شویو ته په بېلابېلو برخو خدمات وړاندې کړي.
د چارواکو په خبره، د طبیعي او غیر طبیعي پېښو۵۱۱ زره ۳۵۳ زیانمنو شویو او بېوزلو هېوادوالو ته خوراکي او غیر خوراکي توکي او نغدي مرستې وېشل شوې دي او دغه راز د هېواد په ۸ مرستونونو کې ۳۶ زره ۹۶۲ بې سرپرسته ماشومانو، کونډو، یتمیانو او معلولانو ته د اعاشې، حرفوي او ښوونیزو زده کړو په برخه کې خدمتونه وړاندې شوي.
د دوی په خبره، د سوري زړه پر ناروغۍ د شاوخوا ۳۰ زره اخته کسانو له ډلې د ۱۴ زرو درملنه شوې.
د افغاني سرې میاشتې ټولنې مرستیال عزیز الرحمن په دې اړه وايي: « زموږ له ۳۰ زرو ډېر هېوادوال د زړه سوري پر ناروغۍ اخته دي، دا هغه کسان دي چې سرې میاشتې ته یې مراجعه کړې. د دغو کسانو له ډلې د پروسې د پيل راهیسې تر ۱۴ زره تنو درملنه شوې. یوازې تېر کال د ۲۰۰۲ تنو درملنه شوې.»
د افغاني سرې میاشتې ټولنې چارواکي زیاتوي چې تېر کال یې څه باندې درې ميليونه ۸۰۰ زره افغانانو ته روغتيايي خدمتونه هم وړاندې کړې او دغه راز يې څه باندې ۲۶۶ زره ميندو او ماشومانو ته بېلابېل واکسينونه هم تطبيق کړي دي.
د دوی په خبره، یاده موده کې د رواني ناروغيو د درملنې د شپږو مرکزونو له لارې ۲ زره۳۸۳ رواني ناروغانو ته د پالنې او درملنې خدمتونه وړاندې شوي.
د افغاني سرې میاشتې ټولنې عملیاتي معین روح الله عبدالسلام وايي: « د شپږو رواني مرکزونو له لارې ټولټال ۲ زره ۳۸۳ رواني ناروغانو ته د پالنې او درملنې خدمات وړاندې شوي دي. ۹۴۷ تنو ته په رواني مرکزونو کې د پالنې او درملنې اسانتیاوې برابرې شوې دي.»
چارواکي دغه راز وایي، تېر کال کې ۳۶ میلیونه افغانۍ په ۶ زره مستحقو کسانو وېشل شوې دي.
