له پاکستانه د درملو پر واردولو د بندیز په دوام، د عامې روغتیا وزارت وايي چې د یاد هېواد پر درملو کلک نظارت کېږي او هېڅوک اجازه نه لري چې وارد یې کړي.
د عامې روغتیا وزیر نورجلال جلالي په دې اړه وايي، د قاچاقي توکو د مخنیوي په برخه کې د اسلامي امارت د زعیم له فرمان سره سم، له امیني او دفاعي سکټورونو سره په همغږۍ، له پاکستانه د هر ډول درملو قاچاق مخنیوی کېږي.
جلالي زیاتوي، د هېواد روغتیايي سکټور ورځ تر بلې د پرمختګ په حال کې دی او د عادلانه صحي خدماتو رسولو لپاره د هر ولایت په مرکز او ولسوالیو کې د مجهزو روغتونونو او روغتیايي مرکزونو جوړلو پلان لري.
عامې روغتیا وزیر زیاتوي: « له پاکستانه د درملو واردات بند شوي، خو د قاچاق په اړه موږ څو ځله له دفاع او کورنیو چارو وزارتونو سره خبرې کړې دي. د قاچاق د مخنیوي په اړه د امیرالمؤمنین یو قانون هم توشېح شوی چې له مخې یې باید دفاع وزارت او کورنیو چارو وزارت متوجه وي چې د قاچاقي درملو مخه ونیسي.»
جلالي دغه راز وايي، د نړیوالو مرستندویه ادارو د مرستو له کمېدو سره، اوس دولتي روغتونونو ته د درملو پېر د دې وزارت له کورنۍ بودیجې څخه کېږي.
هاخوا د درملو پر قاچاق له بندیز سربېره، بیاهم په بازارونو کې پاکستاني درمل پیدا کیږي او دې کار د درملو د قاچاق په تړاو اندېښنې زیاتې کړې دي.
درمل پلورونکي وايي، که څه هم ډېری دا ډول درمل له بندیز وړاندې په عمده ډول هېواد ته راوړل شوي، خو له قاچاقي لارو د درملو راوړل لاهم ادامه لري.
د دوی په خبره، د پاکستانۍ درملو تشه تر ډېره کورنیو، هندي او بنګلهدېشي درملو ډکه کړې، خو په ځینو برخو کې تقاضا نه پوره کوي او بیې یې هم لوړې شوې دي.
درمل پلورونکی احمد شاه وايي: « ډېر وخت کېږي چې پاکستاني درمل بند دي، موږ کمبوتات هم لرو، خو ځینې درمل په قاچاقي توګه راځي. اسلامي امارت ویلي چې هغه درمل چې د تولید نېټه یې له ۲۰۲۶ وروسته وي، که له چا سره پیدا شي، نو د حکومت له خوا به مصادره شي، حتا یو شمېر درملتونونه په همدې جرم بند شوي هم دي. له دې هرڅه سره، پاکستاني درمل اوس هم شته دي.»
درمل پلورونکی عبدالمتین وايي: « کوم درمل چې اوس په درملتونونو کې شته، دا هغه زاړه درمل دي او په هماغو پخوانیو بیو پلورل کېږي. همدارنګه د کندهار، خوست او تورخم له لارې قاچاقي درمل هم راځي. موږ له دولت غوښتنه کوو چې د قاچاق مخه ونیسي.»
بل پلو، ډاکټران بیا د قاچاقي درملو ټیټ کیفیت ته په کتو دا ډول درمل په ټولنه کې د ناروغیو د دوام او خلکو ته د اقتصادي ستونزو پیدا کېدو لاملونه ګڼي.
دوی پر حکومت غږ کوي چې د کورنیو تولیداتو زیاتولو سره دې د درملو په برخه کې شته خلا ډکه او د قاچاقي درملو پر واردولو دې څار زیات کړي.
ډاکټر علي قمرزی وايي: « دا چې درمل د ساتلو لپاره ځانګړې تودوخې درجې او شرایطو ته اړتیا لري، په قاچاقي درملو کې دغه شرایط په پام کې نه نیول کېږي. هغه درمل چې په قاچاقي توګه زموږ هېواد ته راځي، بې کیفیته وي او د جعلي درملو چانس په کې ډېر زیات دی. د دې ډول درملو کارول لوی عوارض او مسمومیت پېښوي.»
دا داسې مهال ده چې عام خلک هم په بازارونو کې د درملو د بیو له لوړېدو شکایت لري او له حکومته په دې برخه کې د جدي پاملرنې غوښتونکي دي.
