د کابل میر بچه کوټ ولسوالۍ روغتون روغتیاپالان: له تېرو پنځو میاشتو راهېسې مو تنخوا نه ده اخېستې 

د کابل په شمال میربچه کوټ ولسوالۍ کې د یوه دولتي روغتون روغتیاپالان وايي، له تېرو پنځو میاشتو راهېسې یې تنخوا نه ده ورکړل شوې او په خبره یې تر دې دمه په وړیا خدمت کوي.

د میربچه کوټ روغتون روغتیاپاله نجلا قیومي وايي: «موږ اوس ستونزې لرو. زموږ ستره ستونزه د کارکوونکو تنخوا ده. له پنځو میاشتو زیات وخت وشو، چې تنخوا نه لرو او تر اوسه مو  نه ده ترلاسه کړې.»

روغتیاپالان وايي، اړ دي چې دلته پرته له تنخوا کار وکړي، ځکه په دې شرایطو کې چې هر لوري ته ولاړ شې امتیازات نه لري.

د میربچه کوټ روغتون یو روغتیاپال ګل نظر وايي: «موږ څه کولای شو، که موږ دلته را نه شو، بله داسې کومه دنده نه شته چې سړی کار وکړي او په بدل کې یې پیسې واخلي. اوس ښه ده چې همدلته پاتې شو.»

اسلامي امارات د محمد جاوید احمدي په نوم یو ۲۲ کلن ځوان د سرتیرو د مشر په توګه ټاکلی دی.

دا سرتیری وایي، د خپلو چارواکو له لوري پر دې څوکۍ ټاکل شوی او وايي تر هغې باتجربه خلک شته، خو تجربه لروونکي کسان په فساد کې ښکېل دي.

د میربچه کوټ روغتون مسوول محمد جاوید احمدي وايي: «نو تجربه کار شخص چې زموږ پر ځای راشي. دا به بیخي ښه شي، خو متأسفانه دلته چې هر پوه کس راغلی دی، هغه بیا یا فاسد او یا ظالم وخیژي.»

میربچه کوټ د کابل ولایت ليرې پرته ولسوالۍ ده، خو په مرکزي روغتونونو کې هم داسې روغتونونه شته چې د امکاناتو له پلوه ستونزې لري او ډاکټرانو یې تنخوا نه ده اخېستې.

اخوا د اسلامي امارات چارواکي وايي، د نړیوالو له لوري چې د درملو کومې مرستې شوي، د یو شمېر ليرې پرتو سیمو روغتونونو ته یې استولي دي.