د پکتیا ولایت مرکز ګردېز کې د دوشنبې پر ورځ د (۱۴۰۳ کال د مرغومي پر ۱۱ مه د ۱۵۰ بستریز رغتون جوړولو چارې پيل شوې.
د دغه ولایت عامې روغتیا ریاست مسوولین وايي، دغه روغتون پر ۲۵ جریبه ځمکه دمتحده عربي متحده اماراتو له لوري د ۵ میلیونه امریکايي ډالرو په مالي لګښت د عامې روغتیا وزارت په همکارۍ جوړېږي.
دوی زیاتوي، د دې روغتون له جوړېدو سره به په دې ولایت کې روغتیایي خدمتونو ته د خلکو لاسرسی لا اسانه شي.
د پکتیا د عامې روغتیا رئیس مولوي معراج ګل عادل وايي: « د دې روغتون په جوړېدو سره به د جنوب ختیځ زون ولسونو ته معیاري روغتیايي خدمات وړاندې شي. موږ بیا هم خپلو ولسونو ته ډاډ ورکوو چې پر دغو پرمختګونو بسنه نه کوو او تل به هڅه کوو چې تاسو ته معیاري روغتیايي خدمات او اسانتیاوې برابرې کړو.»
ځايي چارواکي وايي، د دې ولایت په څو نورو ولسوالیو کې هم د یو شمېر نورو کلینیکونو د جوړېدو خبر ورکوي او زیاتوي، د روغتیایي خدمتونو د پراختیا لپاره به خپلې هڅې دوامداره ساتي.
د سرحدي ځواکونو عمومي قومندان مولوي محمد شریف منګل وايي: « دا شفاخانه به یوازې د پکتیا ولایت پورې محدوده نه وي، انشالله د زون پر سطحه بلکې هر ځای چې د مسلمانانو ضرورت او ناروغان وي، د دې روغتون دروازې به د دوی د ناروغانو پرمخ خلاصې وي.»
د پکتیا د والي مرستیال انعامالله صلاح الدین وايي: « د جي اېچ په نوم نور کلینیکونه هم دي چې دا ډېر قوي روغتونونه دي او تقریبا ًداسې لکه د څمکنیو یا د زرمت په شان ۱۲ نور هم منظور شوي او په راتلونکي کال کې به په نورو ولسوالیو کې آبادېږي او ځمکې ورته تثبت شوې دي.»
ورته مهال، د پکتيا اوسېدونکي د دې روغتون په جوړېدو خوښي څرګندوي او وايي، د یاد روغتون په جوړېدو سره به يې روغتيايي ستونزې څه نا څه هوارې شي.
د پکتيا اوسېدونکی شمشاد بهرام وايي: « له دې سره به زموږ د خلکو ډېر ستونزې هوارې شي. زموږ ناروغان به کابل ته وړل کېدل یا نورو ګاونډیو هېوادونو ته محتاج وو چې دلته اقتصادي مسایل، د وېزې او د لارې لګښتونه او ستونزې هم وې، دا به ټول له دې اقدام سره حل شي.»
د پکتیا یو بل اوسېدونکی قاري ایوب صابر وايي : « نن ډېره د خوښۍ خبره ده چې د پکتیا په مرکز ګردېز کې د روغتون ډبره اېښودل کېږي. له دې وړاندې زموږ خلک د ډېر نفوس له امله له ګڼو ستونزو سره مخامخ وو، هیله ده دغه ستونزې حل او خلک د روغتون له سهولتونو برخمن شي.»
د پکتیا اوسېدونکی عید محمد وايي: « له دې وړاندې روغتون نه و او ناروغان به نورو هېوادونو ته تلل او په لارو له ډېرو ستونزو سره مخ وو. دا ډېر ښه اقدام دی او باید دا روغتون په داسې ډول جوړ شي چې د ناروغانو تشخیص وشي او نورو هېوادونو ته له تګ څخه خلاص شو.»
د پکتيا په مرکز ګردېز کې د یاد ۱۵۰ بستریز روغتون چارې داسې مهال پیل کېږي چې په دې ولایت کې د کافي روغتيايي اسانتياوو د نه شتوالي له امله ډېری وخت خلک اړ کېږي چې خپل ناروغان کابل او يا خوست ولایت ته ولېږدوي.
