د هلمند د واشېر ولسوالۍ د ښوراب پوځي اډې ته څېرمه، د هرات ـ کندهار پر لویه لار د روغتیايي خدمتونو نه شتون له امله، ډېری وخت د ټرافیکي پېښو ټپیان او عاجل ناروغان روغتون ته تر رسېدو وړاندې خپل ژوند له لاسه ورکوي.
د همدې ستونزې د هواري په موخه، د ۲۱۵ عزم قول اردو له خوا پر یاده لاره یو ۲۰ بستریز روغتون جوړ او ګټه اخستنې ته وسپارل شو.
د دې قول اردو مسوولان وايي، روغتون په اړینو طبي تجهیزاتو، امبولانسونو او مسلکي روغتیايي پرسونل سمبال دی چې د خلکو لپاره به ۲۴ ساعته روغتیايي خدمتونه چمتو کوي.
د ۲۱۵ عزم قول اردو قوماندان محمد ایوب خالد وايي: « د دې لپاره چې په ټکرونو کې د ژوبلو شویو کسانو خدمت وشي او دا چې له دلارام تر ګرېشک پورې سیمو خلکو روغتیايي مرکزونو ته لاسرسی نه درلود، موږ دا روغتون جوړ کړ.»
د روغتون مسوولین وایي، په دې مرکز کې اووه ډوله روغتیايي خدمات وړاندې کېږي چې د ښځینه ناروغانو لپاره ځانګړې څانګه هم په کې فعاله ده او د ښځینه ډاکټرانو له خوا به یې چارې پر مخ وړل کېږي.
د روغتون رییس نعمت الله امین وايي: « موږ د لویې لارې پر غاړه دا شل بستریز روغتون جوړ کړ چې تاسو ولیدل نن مو یې پرانسته وکړه. په دې روغتون کې د الټراسونډ، لابراتوار، اېکسرې او نور خدمات وړاندې کېږي. همدارنګه، له موږ سره په دې روغتون کې ښځينه ټيم هم شته چې دوی به د ښځینه ناروغانو او ټپیانو درملنه کوي.»
په همدې حال کې د هرات ـ کندهار پر لویه لار موټرچلوونکي او ځايي اوسېدونکي د دې روغتون جوړېدل د ټرافیکي پېښو د قربانیانو او نورو بېړنیو ناروغانو لپاره مهمه روغتیايي لاسته راوړنه بولي، خو ټینګار کوي چې د لویې لارې په نورو برخو کې دې هم ورته مرکزونو جوړ شي.
د سیمې اوسېدونکی عبدالجامي وايي: « په دې سیمه کې د یوه روغتیايي مرکز شتوالی ډېر اړین و؛ ځکه په دې سیمه کې هېڅ روغتون او کلینیک نه شته. کله به چې موږ ته عاجل ناروغ پېښ شو، تر ولایت پورې به یې یا ساه ورکړه او یا به د کوما حالت ته لاړ.»
د سیمې بل اوسېدونکی عبدالرحیم وايي: « دا ډېر مهم کار وشو. کله چې په دې لاره ټرافیکي پېښه کېده، نږدې روغتون او کلینیک نه و چې خلک ټپیان ور ولېږدوي، ټپي به ساه ورکړه. اوس به انشاالله څوک نه تلف کېږي.»
د ا روغتون په داسې حال کې ګټه اخستنې ته سپارل کېږي چې د هرات ـ کندهار پر لویه لار هر کال لسګونه ټرافیکي پېښې رامنځته کېږي او تمه ده چې یاد روغتیايي مرکز به د ټپیانو پر وخت درملنې او د مرګ ژوبلې په کمولو کې مهم رول ولوبوي.
