د ننګرهار ولایت مرکز جلال آباد ښار اړوند درمسال سیمه کې به پخوا اهل هنود حکیمان ناست وو او خلکو ته به یې د بېلابېلو ناروغیو د درملنې لپاره یوناني درمل ورکول.
خو اوس چې ډېری اهل هنودو افغانستان پرېښی، په دغه سیمه کې د یو شمیر غیر مسلکي کسانو له خوا خلکو ته په خپلسرې توګه د درملو ورکول پيل شوي او خلک ترې شکايت کوي چې دا کار د ګټې پر ځای ډېر زيان لري.
د جلال آاباد ښار یوتن اوسېدونکی وايي: « مسلکي کسان نه شته او هرڅه سره لړي او خلکو ته یې ورکوي. پخوا به هندوانو سم درمل ورکول، خو اوس هرڅه غلط دي. له حکومت غواړو چې په دې اړه پلټنه وکړي او مضر درمل ټول کړي.»
همدارنګه د جلال آباد یو بل اوسېدونکي هم په دې اړه شکایت لري او وايي: « سېکانو او هندوانو به هر درمل په ضمانت او ښه کیفیت درکول، خو اوس غیر مسلکي کسان ناست دي او په خلکو درمل خرڅوي. هیله لرم د دغو کسانو مخه ونیول شي.»
ځېنې نور بیا وايي، پخوا به چې خلک له عصري طبابت نا امیده کېدل، نو د همدې درمسال مخې ته له ناستو اهل هنودو به يې له طبعي بوټو جوړ شوي بېلابېل درمل اخيستل، خو اوس دغه بازار د نامسلکي حکيمانو له لوري کمرنګه شوی.
د یوناني درملو یو تن پلورونکی وايي: « دا بازار د سېکانو او هندو باوره حکیمانو په وسیله جوړ و؛ هغوی هم په درملو او هم په ناروغیو پوهېدل. اوس هر سړی راغلی او دوکان یې پرانیستی او پر خلکو درمل خرڅوي.»
ننګرهار کې د خوړو او درملو ادارې مسوولین وايي، هیچاته اجازه نه ورکوي چې په خپلسر دې پر خلکو درمل وپلوري او په خبره یې اوسمهال یې په دغه برخه کې خپل څار ډېر کړی.
مسوولین زیاتوي، پخوا به یوناني درمل له پاکستان په قاچاقي ډول راوړل کېدل، خو اوس یې د دې چارې مخه هم نیولې ده.
د ننګرهار خوړو درملو ریاست د درملیزو محصولاتو آمر ډاکټر اول ګل خادم وايي: « دا خلک مو یو څه کنټرول کړي او پاتې نور به هم د وخت او اصولو سره سم کنټرول او مسلکي کوو. کله چې موږ راغلو په دې ساحه کې رسمي حکیمي درملتونونه نه وو او غیر رسمي درمل جوړېدل او قاچاقي هم راتلل؛ اوس تر ډېره حده د قاچاقي درملو مخه هم نیول شوې ده.»
د ننګرهار په درمسال سیمه کې نه یوازې خلکو ته په خپلسر درمل ورکول کېږي، بلکې دغلته له یو شمېر کسانو د تعویذ او مهرو دم کولو لپاره هم په زرګونه افغانۍ اخیستل کېږي چې هېڅ ګټه نه لري.
