د لوی اختر په را رسېدو سره ډاکټران د کانګو ناروغۍ د احتمالي زیاتوالي په اړه خبر ورکوي.
دا چې کانګو له څارویو انسانانو ته انتقالېدای شي، نو ډېر کله د لوی اختر په را رسېدو او د څارویو قرباني کولو پرمهال پراختیا مومي.
د بلخ عامې روغتیا ریاست د انتاني څانګې ډاکټران وایي، تېرو پنځو میاشتو کې په دې ولایت کې پر کانګو ناروغۍ ۳۰ کسان اخته شوي او د څلورو کسانو ژوند یې اخیستی دی.
د بلخ ولایت د انتاني څانګې مسوول ډاکټر نورالحق سیغاني وايي: « د روان زېږدیز کال له پیل راهیسې شاوخوا ۳۰ تنو مراجعه کړې چې له ډلې د ۸ تنو راپور مثبت ختلی، ۳ تنه مو فوتي لرل، یو ناروغ کابل ته واستول شو، خو خبر شوم چې هغه هم ژوند له لاسه ورکړی. زموږ لویه ستونزه دغو ناروغانو ته د وینې پیدا کول دي. بله دا چې اکثریت یې پایوازان نه لري او که ويې هم لري، باید له پنځو تر شپږو کسانو وینه واخیستل شي. اکثریت ناروغان له دې امله ژوند بایلي چې وینه نه شي پیدا کولی.»
د انتاني څانګې ډاکټر مصطفی خوشیوال وايي: « دا ناروغۍ د څارویو له کنې یا کیک انتقالېږي؛ هغه کسان چې شغل قصابي، پوست جلابي او دهقاني وي یا له څارویو سره کار لري، دا کسان تر نورو ډېر پرې اخته کېږي.»
د کانګو تبه یوه وژونکې ناروغي ده چې له څارویو سره تماس او له غوښې د ګټې اخیستنې پرمهال انسان ته انتقالېږي.
که څه هم په دې روغتیایي مرکز کې پر کانګو اخته کسان د یادې ناروغۍ په نښو نښانو او لېږدېدلو خبرې کوي، خو ډاکټران بیا په دې روغتون کې د هر راز خدماتو د وړاندې کولو ډاډ ورکوي.
په کانګو ناروغۍ یوتن اخته ناروغ محمد آصف وايي: « دوې اوونۍ کېږي چې تبه راباندې راغلې، ورپسې مې له پوزې وینې راغلې؛ بیا روغتون ته راغلم او درې ورځې کېږي چې بستر یم. اوس شکر څه ناڅه ښه یم.»
د انتاني څانګې ډاکټر عبدالصبور حقمل وايي: « دلته په ټاکلي وخت تطبیقات کېږي، مؤظف نرسان شته او خدمات وړاندې کوي. په کانګو اخته ناروغان تبه او له دوو اوونیو وروسته خونریزي لري؛ دا یې عامې نښې دي. بله نښه یې دا ده چې کبدي انزایمونه یې پورته ځي او پلټ لېټ یې ښکته کېږي.»
په ورته مهال د بلخ عامې روغتیا مسوولین که څه هم د کانګو له زیاتوالي خبر ورکوي، خو وایي بلخ کې تازه د یادې ویروسي ناروغۍ د درملنې لپاره ۲۰ بستریز روغتون جوړ شوی او له کانګو سره د مبارزې لپاره یې د عامه پوهاوي یو لړ پروګرامونه هم پیل کړي دي.
د بلخ عامې روغتیا ریاست ویاند کمال خان ځدارڼ وايي: « موږ د دې لپاره د کلیو له ملا امامانو او دغه راز له قصاباتو سره د عامه پوهاوي پروګرامونه جوړ کړي، ترڅو د دوی له لارې خلک له دې ناروغۍ وژغورو. دغه راز په روغتیايي مرکز کې د دې ناروغانو لپاره یو ۲۰ بستریز ځای جوړ شوی او ډاکټران په کې توظیف شوي دي. له خلکو مو هیله ده چې د کانګو پر ناروغۍ اخته کسانو ته تازه وینه ورکړي او ژوند یې وژغوري.»
له کانګو سره د مبارزې لپاره د بلخ کرنې او مالدارۍ ریاست مسوولین هم د یو لړ پروګرامونو یادونه کوي او ډاډ ورکوي چې د څارویو لپاره یې د واکسین کمپاین پیل کړی دی.
د بلخ کرنې او مالدارۍ رییس محمد موسی مبین وايي: « موږ څه ناڅه واکسین لرو او هېوادوالو ته ډاډ ورکوو چې نور واکسینونه به هم پیدا کړو، له موسساتو مو په دې اړه غوښتنه کړې. باید د دې ناروغۍ مخنیوی وکړو، دا داسې ناروغي ده، که یې مخه ونه نیول شي، تلفات یې ډېرېږي. موږ له خلکو غوښتنه کوو، که په خپلو څارویو کې د دې ناروغۍ نښې ویني، زموږ د مالدارۍ له آمریت سره دې اړیکه ونیسي، ترڅو یې مخه ونیسو.»
د کانګو وژونکې ناروغي د لومړي ځل لپاره په روسیه او اوکراین کې وموندل شوه او په وروستیو کلونو کې یې افغانستان کې هم یو لړ مثبتې پېښې ثبتې شوې چې د روغتیا نړیوال سازمان اندېښنې یې له ځان سره راپورته کړې.
