د روغتیا نړیوال سازمان(ډبلیو.اېچ.او) خبرداری ورکړی چې په روان ۲۰۲۵ زېږدیز کال کې به ۱۰ سلنه افغانان له روغتیایي خدمتونو بې برخې شي.
د افغانستان لپاره د یاد سازمان استازي له فرانس پرېس خبري آژانس سره مرکه کې ویلي، په راتلونکو څو میاشتو کې به په افغانستان کې ۲۲۰ نور هغه روغتیایي مرکزونه هم وتړل شي چې د دې سازمان له لارې د بهرنيو بسپنه ورکوونکو په مالي لګښت تمويلېدل.
اډوین سالوادور په خبره، د دغو مرکزونو په تړل کېدو سره به شاوخوا ۳ میلیونه افغانان له روغتیایي خدمتونو بې برخې شي.
هغه په دې اړه ویلي:« په راتلونکو میاشتو کې ۲۲۰ نور روغتیايي مرکزونه د تړل کېدو له ګواښ سره مخ دي. دا چاره به د دې هېواد له ۱ زر ۶۸ زیات روغتیايي مرکزونه زیانمن کړي چې له کبله به یې ۲ یا ۳ میلیونه نور کسان هم له روغتیايي خدمتونو بې برخې شي. کله چې تمویل بند شو، موجوده مرسته کوونکو هڅه وکړه چې تشه یې ډکه کړي، خو د امریکا د تمویل پرېښودو له امله ډېره لویه خلا رامنځته شوې ده.»
سالوادور په بېلابېلو برخو کې له افغانستان سره د امریکا د مالي ملاتړ ځنډېدل او په بشپړه توګه د بشري مرستو بندېدل د روان ناوړه وضعیت اصلي عوامل یاد کړي او د روغتیا په برخه کې یې له نړیوالو بسپنه ورکوونکو غوښتي چې افغانان یوازې پرېنږدي.
هغه زیاته کړې: « په افغانستان کې روغتیایي سیسټم له وړاندې ډېر نازک حالت درلود. وضعیت د خرابېدو په حال کې دی او که موږ دا تشه په ګډه ډکه نه کړو، وېرېږم چې حالت به لا پسې خراب شي. په دې برخه کې د نړیوالو بسپنه ورکوونکو لاسنیوی ډېر اړین دی.»
د عامې روغتيا وزارت مسوولین په دې اړه څه نه وايي، خو ډاکټران د افغانستان اوسنی روغتیایي وضعیت د اندېښنې وړ بولي او په خبره یې، موجوده روغتیایي خدمتونه هم د خلکو لپاره بسنه نه کوي.
ډاکټر محمد عابد فهام وايي: « افغانستان کې اوسني روغتیايي خدمتونه هم کفایت نه کوي. که چېرې دا ۲۲۰ نور مرکزونه هم وتړل شي، نو د افغانستان لپاره ډېره لویه تشه ګڼل کېدای شي.»
په افغانستان کې روغتیایي وضعیت وروسته له هغې ډېر د اندېښنې وړ وبلل شو چې په تېره جنورۍ میاشت کې د امریکا له لوري بشري مرستې بندې شوې او په داسې حال کې چې د روغتیا نړیوال سازمان په روغتیایي برخه کې د افغانستان لوی تمویلوونکی سازمان و؛ په ځینو برخو کې یې ملاتړ کم او یا په بشپړه توګه بند شو.
ملګرو ملتونو له دې وړاندې خبرداری ورکړی و چې د تمویل د کمېدو له امله ښايي تر۹ میلیونو ډېر افغانان له روغتیايي خدمتونو بې برخې شي.
