د افغانستان اسلامي امارت د اقتصاد وزارت له لورې په کورنیو او بهرنیو غیرې دولتي موسسو کې د ښځو پر کار بندیز حکم د افغانانو پر اقتصاد او ژوند منفي اغیز کړی دی.
تازه د خوړو نړیوال پروګرام وایي، دغه پریکړه د افغانانو په ژوند مستقیم اغیز لري او پر خوار ځواکۍ د اخته ماشومانو شمېر به زیات شي.
افغانستان کې د خوړو نړیوال پروګرام ویاند فیلیپس کروپ ویلي:« په افغانستان کې اوس د خوارځواکۍ کچه د ریکارډ په کچه لوړه شوې او تېر کال د افغانستان نیمایي خلک له سختې لوږې سره مخ ول. دا مهال د میندو په شمول ۷ میلیونه ماشومان،چې عمرونه یې له پنځه کلونو کم دي خوارځواکي دي. افغانان که څه هم له لوږې نه مري،خو له بشري ناروین سره د مبارزې لپاره هېڅ سرچینه ورپاتې نه ده.»
کروپ ویلي، ډېری موسسو د روغتیا، پوهنې او خوړو په برخو کې خدمتونه رسول او بشري مرستې یې کولې، چې وروستي حکم د ډېری موسسو فعالیتونه ننګولي او دغې چارې د خلکو پر ژوند اغیز کړی دی.
هغه زیاته کړې:«مرستندویه ادارې پر اړمنو افغانانو د روغتیا،خوړو او زده کړو برخو کې مرستې ویشي. وروسته له هغې چې طالبانو پر ښځینه کارکوونکو بندیز ولګاوه، دا بهیر سخت ټکنی شوی دی. له دې پریکړې وروسته د افغانستان په کچه د ۴۳۷ ګرځنده کلینیکونو له ډلې ۱۱۵ هغو یې فعالیتونه ځنډولي دي،چې پر ۸۲ زرو ماشومانو او مېندوارو ښځو یې اغیز پرېښی دی.»
روغتیا پالان هم مني،چې پوره خوړو ته نه لاسرسی په ماشومانو کې د خوراځواکۍ ناروغي رامنځته کوي.
یوازې ښځې او ماشومان نه دي،چې د پوره خوړو له نشتون سره پر خوارځواکۍ اخته شوي، د ملګرو ملتونو د راپورونو پر بنسټ روان ۲۰۲۳ زېږدیز کال کې ۲۸ میلیونه افغانان بشري مرستو ته اړتیا لري او له دغې ډلې شپږ میلیونه یې له لوږې سره مخ دي.
