د چین پلازمېنې بېجېنګ ته د متحده ایالتونو ولسمشر ډونالډ ټرمپ د سفر په درشل کې د سپینې ماڼۍ چارواکو ویلي چې ټرمپ کولی شي پر چین د ایران په تړاو فشار وارد کړي، ترڅو بېجېنګ د خپل نفوذ په کارولو سره په سیمه کې د ثبات په ټینګښت کې مرسته وکړي.
د سپینی ماڼۍ یوې ویاندې آنا کیلي ویلي، تمه ده ولسمشر ټرمپ د چهارشنبې په ورځ ناوخته بېجېنګ ته ورسیږي او د پنجشنبې په ورځ رسماً له خپل چیني سیال شي جېنګ پنګ سره وګوري.
نوموړې د خپلو خبرو په یوه برخه کې ویلي: « ولسمشر ټرمپ به د چهارشنبې په ورځ بېجېنګ ته ورسیږي او د پنجشنبې په ورځ به له خپل چینايي سیال سره خبرې وکړي. له دې وروسته به په یوه پروګرام کې چې د هیوین د معابدو څخه لیدنه هم په کې شامله ده، ګډون وکړي.»
چین ته د ټرامپ د سفر په درشل کې د متحده ایالتونو د خزانې وزیر سکاټ بیسنت تېره اوونۍ پر چین تور پورې کړ چې د ایران مالي ملاتړ کوي.
د ده په خبره، ایران د تروریزم تمویلوونکی هېواد دی او چین د ایران د انرژۍ د ۹۰ سلنو په پیرلو سره، د ایران ستر مالي ملاتړ کوي.
د متحده ایالتونو د خزانې وزیر د څرګندونو یوه برخه کې راغلي: « ایران په نړۍ کې د تروریزم تمویلونکی هېواد دی او چین د ایران د انرژۍ نوي سلنه پېري. نو په دې ترتیب، چین د تروریزم ستر تمویلونکي هېواد مالي ملاتړ کوي.»
د ټرمپ د دې سفر د اجنډا په مهمو مسایلو کې د ایران جګړه او د هرمز تنګي خلاصول هم شامل دي. همدارنګه ولسمشر ټرمپ به هڅه وکړي چې د چین له نفوذ څخه منځني ختیځ کې د ثبات د ټینګښت او له هرمز تنګي څخه د تېلو د لېږد بهیر باوري کولو لپاره کار واخلي.
د ټرمپ له دې لیدنې مخکې په مارچ میاشت کې د چین او متحده ایالتونو جګپوړو چارواکو په پاریس کې سره ولیدل، ترڅو د دواړو هېوادونو د مشرانو ترمنځ د لیدنې لپاره مقدمات برابر کړي.
د ټرمپ له دې پلان شوې لیدنې څخه وړاندې، د ایران بهرنیو چارو وزیر عباس عراقچي هم بېجېنګ ته سفر وکړ او د یوه منځګړي په توګه یې د چین ونډه روښانه کړه.
