د اطلاعاتو او فرهنګ وزارت وايي، هېواد ته د بهرنیو سیلانیانو په راتګ کې د پام وړ زیاتوالي راتلو ته په کتو، په پام کې ده چې د ګرځندوی سکټور د هېواد په کچه پراخ او سیلانیانو ته لا زیاتې اسانتیاوې برابرې شي.
د دې وزارت د معلوماتو له مخې، یوازې د کوچني اختر په ورځو کې شاوخوا ۲۰۳ میلیونه کورنیو او بهرنیو سیلانیانو د هېواد له تفریحي سیمو او طبیعي جاذبو لیدنه کړې او دا کچه د تېرو کلونو په پرتله د پام وړ زیاتوالی ښيي.
د اطلاعاتو او فرهنګ وزارت ویاند خبیب غفران وايي، د هېواد له تفریحي سیمو او جاذبو څخه د ګڼ شمېر سیلانیانو لیدنه په هېواد کې د سیاحت وده او پیاوړتیا څرګندوي.
غفران زیاتوي: « د کوچني اختر په ورځو کې شاوخوا ۲.۳ میلیونه کورنیو او بهرنیو سیلانیانو د هېواد له تفریحي سیمو او طبیعي جاذبو څخه لیدنه کړې. د سیلانیانو دا شمېرې د تېرو کلونو په پرتله د پام وړ زیاتوالی ښيي او د سیاحت د ودې او پیاوړتیا څرګندونه کوي. د اطلاعاتو او کلتور وزارت هڅه کوي چې د هېواد په کچه د ګرځندوی سکټور پراخ، پیاوړی او سیلانیانو ته لازیاتې اسانتیاوې برابرې کړي.»
دغه راز، د اطلاعاتو او فرهنګ وزارت مسوولین د چاپېریال ساتنې، د عامه ځایونو پاکوالي ته پاملرنې او د سیاحتي جاذبو د ساتنې لپاره د خلکو پر همکارۍ د ټینګار ترڅنګ زیاتوي چې سیلانیان کولی شي د امنیتي ادارو په همکارۍ د هېواد ګوټ ګوټ ته په پوره ډاډ سفرونه وکړي.
