د خیبرپښتونخوا په دېره اسماعیل خان پوهنتون کې په دې اړه جوړو شویو مراسمو کې پر زرګونه زده کړیالانو سربېره ګڼو کولتوري فعالانو او فرهنګیانو هم ګډون درلود. د مراسمو ګډوانوال وايي، د دې ورځې له نمانځلو يې موخه د خپلو دودونو يادونه او ژوندي ساتل دي.
دوی دا هم وايي چې د ورته کلتوري مېلو په وسيله پښتنو ته د خپلمنځي يووالي او نورو قومونو ته د سولې پيغام ورکوي.
د پښتنو کولتوري مېلې یو تن ګډونوال وايي: « د دې پروګرام مقصد دا دی چې موږ نړۍ ته د امن پیغام ورکړو او ورته ووایو چې پښتانه امن خوښوونکي خلک دي، سوله غواړي او له قلم سره ډېره مینه لري.»
د مېلې یو بل ګډونوال وايي: « موږ باید خپل فرهنګ او ثقافت ژوندی وساتو. موږ غواړو په دې ډول پروګرامونو سره نړۍ ته د پښتون فرهنګ، کولتور او ثقافت وښيو.»
له دې وړاندې هم د پښتنو د کولتور ورځ پر خيبرپښتوانخوا سربېره، د پاکستان په ځينو پوهنتونونو کې نمانځل شوې چې په کې د پښتنو کولتور نندارې ته وړاندې کولو سره يې د سولې پيغام رسولی دی.
