د محمد یونس دوه بچیان د وینې کمښت یا تلاسیمیا ناروغۍ اخته دي؛ هغه وايي، د ژوند پر ټولو کارونو يې یوازې همدې پوښتنې سیوری غوړولی چې وینه به دا ځل له کومه کوي؟
سره له دې چې د وینې کمښت ناروغۍ د ډېرو کورنیو خوشالۍ تروړلې، تازه خوست کې د وینې بانک هڅو د دغو کورنیو هیلې را غوړولې دي.
ناروغ لرونکی محمد یونس وايي: « دا هغه چا ته پته لګي چې دا ډول ناروغان ولري چې دا څومره درد لري او څومره سخت کار دی.»
په خوست کې د یوه خیریه وینې بانک فعالیت نه یوازې محمد یونس بلکې ورته نور ناروغ لرونکي او ځایي اوسېدونکي هم یو حیاتي ګام بولي او د ورته هڅو د ملاتړ غوښتونکي دي.
ناروغ لرونکی داوود جان وايي: « زه دې هلک ته په اوونۍ کې تازه وینه ورکوم او نجلۍ ته په شلو ورځو کې. اوس مې ایله اندېښنه ختمه شوې، کله چې د وینې ورکولو وخت شي، امبولانس راشي او وینه ورکوونکي کسان را وغواړي او وینه واخلي.»
د خوست اوسېدونکی نعیم محمد وايي: « ما چې کله اعلان واورېد، لازمه مې وګڼه چې راشم او وینه ورکړم.»
د خوست اوسېدونکی فخرالدین اتل وايي: « ترټولو ښه خبره دا ده چې دا ټولنه تقویه شي او د تقویه کولو لاره یې دا ده چې شتمن کسان را مخکې شي او له دې بانک سره مرسته وکړي، ځکه دا یو ټولنیز بنسټ دی او خلک باید ورسره مرسته وکړي.»
د خوست اوسېدونکی روشان ګل وايي: « کله چې د وینې د اړتیا غږ اورېدل کېږي، باید هرڅوک ځان ور ورسوي او له اړمنو سره مرسته کې ونډه واخلي.»
په خوست کې د وینې بانک که څه هم نوې هڅه ده، خو د دې برخې مسوولین ډاډ ورکوي چې خپل فعالیتونه به هېواد شموله کړي.
د ټولنیز ژوند پراختیا ټولنې رییس رمضان غوري وايي: « شاوخوا پنځه سوه کسان موږ په خپل لېست کې نیولي چې موږ ته به وینه راکوي. که چا سره د راتګ وخت نه وي، موږ خپل امبولانس ور استوو او وینه ترېنه اخلو. »
د ټولنیز ژوند پراختیا خیریه ټولنه چې په بېلابېلو نورو برخو کې هم د خلکو ملاتړ کوي، یوازې یې د وینې د همدې وړیا بانک په مرسته په خوست کې تېره یوه میاشت ۲۰۰ ناروغانو ته په زرګونه سي سي وینه رسولې ده.
غوښتنه دا ده چې خلک باید خپل نومونه د وينې وړيا ورکولو په موخه د دې بانک په لېست کې ثبت کړي.
