په ختیځ زون کې د ماشومانو د ګوزڼ یا پولیو واکسین کمپاین داسې مهال پیلېږي چې د کتلوي معافیت د مسوولینو په خبره، د دوی د هڅو په پایله کې اوس مهال د ختیځ زون ۹۸ سلنه ماشومان د پولیو واکسین ته لاس رسی لري.
دوی زیاتوي، د پلان له مخې به په دې څلور ورځني کمپاین کې چې د دوشنبې په ورځ پیل کېږي، نږدې یو نیم میلیون ماشومان واکسین شي.
خیتځ زون کې د کتلوي معافیت ادارې مسوول ډاکټر حکم خان ګلابزوی وايي: « دا کمپاین به ۴ ورځې ادامه ولري او هغه ټول ماشومان به واکسین شي چې عمرونه یې له ۵ کالو کم وي. په ننګرهار ولایت کې شاوخوا ۹۵۰ زره او په ټول ختیځ زون کې ۱ میلیون او ۴۵۰ زره تنه ماشومان زموږ هدف دی. په دې کمپاین کې ۶ زره تنه واکسیناتوران برخه لري چې د ۵۸۰ تنو سوپروایزرانو او ۱۱۰ تنو کوارډیناټورانو له خوا یې تخنیکي ملتیا کېږي.»
په ختیځ زون کې د پولیو واکسین د پیل مراسمو ته د پولیو ځینې قربانیان هم وربلل شوي وو. دوی له کورنیو څخه په کلکه وغوښتل چې خپل ماشومان واکسین کړي.
۲۸ کلن غلام حیدر چې د ننګرهار د کوټ ولسوالۍ اوسېدونکی دی وايي، ۲ کلن و چې د پولیو ویروس وهلی او اوس فلج دی. نوموړی د خپل حالت مسوول کورنۍ بولي او وايي، د ده پر وړاندې یې بې غوري کړې او واکسین یې نه دی ورکړی.
غلام حیدر وايي: « زه د واکسین نه کولو له امله فلج یم. پخوا به چې کله واکسین کلیو ته لاړ، خلکو به وشړل او ماشومان به یې نه وروستل. زما له ټولو خلکو هیله ده چې خپلو ماشومانو ته په ټاکلي وخت واکسین ورکړي، ترڅو زما په څېر ستونزو سره مخ نه شي.»
غلام حیدر وايي، فلج له امله د ژوند چارې په سمه توګه مخته نه شي وړلی او له سختو کړاوونو سره مخ دی. د ده په خبره، د دایمي فلج د مخنیوي یوازینۍ لاره ماشومانو ته د پولیو د څاڅکو ورکول دي.
فلج وهلی غلام حیدر وايي: « ستونزې مې ډېرې دي او دا خپله لویه ستونزه ده چې په ویلچر کې ګرځم. زه خلک ګورم چې په خپلو پښو ګرځي، خو زه په دې ویلچر کې ناست یم. دا حالت ما سخت ناهیلی کوي، خو بیا هم امید په کار دی او مبارزه به کوو.»
د روغتیايي مسوولینو د معلوماتو له مخې، اوسمهال دوی په دې بریالي شوي چې هغو ټولو سیمو ته واکسین ورسوي چې له دې وړاندې د نا امنیو له امله ماشومان په کې له واکسین بې برخې وو.
همدارنګه دوی زیاتوي، هڅې روانې دي چې د واکسین په وړاندې شته ناسم افکار او اندونه هم له منځه یوسي.
