ختيځ زون کې د ماشومانو د ګوزڼ(پولیو) ویروس له منځه وړلو کمپاین د پرانستې مراسمو کې روغتیایي چارواکي وايي، پلان لري چې د ٦زره ۱۰۰ تنو رضاکارانو له لارې په ټول زون کې له پنځو کلونو څخه کم عمره شاوخوا یو میلیون او ۴۰۰ زره ماشومان واکسین کړي.
ختیځ زون کې د کتلوي معافیت ادارې آمر ډاکټر حکم خان ګلابزوی وايي: « دا کمپاین د دوشنبې په ورځ پیل کېږي او څلور ورځې به ادامه ولري. په دې کمپاین کې به هغه ټول ماشومان واکسین شي چې عمرونه یې له پنځو کالو کم وي. موږ په ننګرهار کې ۹۱۴ زره او د ټول زون په کچه یو میلیون ۳۸۴ زره تر پنځو کالو کوچني ماشومان لرو.»
چارواکو د دې کمپاین د پیل په مراسمو کې زیاته کړه، اوسمهال دوی د ختیځ زون ٩٨ سلنه سیمې د واکسین تر پوښښ لاندې لري او تېرو دوه کلونو کې یاد زون کې نه کومه محیطي او نه هم انساني پېښه ثبت شوې.
د ننګرهار عامې روغتیا رییس مولوی امین الله شریف وايي: « موږ په تېرو دوو کالو کې خپل هدف تر ۹۸ سلنو پوره کړی، داسې چې په تېرو شپږو میاشتو کې هېڅ ډول محیطي او انساني پېښه نه لرو. موږ هڅه کوو په نږدې وخت کې خپله حوزه له پولیو پاکه اعلان کړو.»
ننګرهار مېشتي وایي، که ولسونه د پولیو واکسین له رضاکارانو سره مرسته وکړي او پر وخت خپل ماشومان واکسین کړي، دا لاعلاجه ناروغي په بشپړه توګه له منځه تلی شي.
د ننګرهار اوسېدونکی عبدالغفار وايي: « زه په ولسونو غږ کوم چې د ګوزڼ واکسین کمپاین پیل شوی او دوی دې خپل ماشومان په وخت سره واکسین کړي. پولیو داسې ناورغي ده چې هېڅ ډول علاج نه لري او ماشومان د تل لپاره فلجوي.»
د ننګرهار اوسېدونکی عبدالوهاب وايي: « زه په هر وګړي او هر کس غږ کوم چې خپل له پنځو کالو ټول کوچني ماشومان واکسین کړي، ترڅو د فلج له ناوړه ناروغۍ وژغورل شي.»
د مسوولینو د معلوماتو له مخې، ختیځ زون کې د پولیو واکسین د کمپاین پرمهال د ولسونو ونډه مهمه ده او هڅه یې داده چې د یادې حوزې سل سلنه سیمې د واکسین تر پوښښ لاندې راولي او یاده حوزه له پولیو پاکه اعلان کړي.
