د هېواد فرهنګي ميراثونو د ساتنې علمي څېړنیز سمینار د اطلاعاتو او فرهنګ وزارت له لوري د اسلامي امارت چارواکو او ځینو هېوادونو د سفیرانو په حضور کې پرانستل شو.
د د ې وزارت چارواکي وایي، دا ډول سیمینارونه د فرهنګي اثارو د ساتنې لپاره اغېزناک دي او ټینګار کوي چې د فرهنګي ميراثونو ساتنه د خلکو او حکومت ګډ مسوولیت دی.
د دوی په خبره، د تېرو څو لسيزو جګړو له امله فرهنګي ميراثونه سخت زیانمن شوي، خو د اسلامي امارت له راتګ سره يې خوندیتوب ته ځانګړې پاملرنه شوې.
د اطلاعاتو او فرهنګ وزارت د فرهنګ او هنر معين عتیق الله عزیزي وايي: « لکه څرنګه چې د دې هېواد نورو برخو ته زیانونه اوښتي وو، دغه شان فرهنګي اثارو، تاریخي ځایونو او تاریخي میراثونو ته هم ډېر زیان اوښتی. د اسلامي امارت په راتګ سره لکه څرنګه چې نورو برخو ته پاملرنه وشوه، د امنیت، اقتصاد، ثبات او له نړۍ سره د اړیکو ټینګولو په برخه کې ګامونه پورته شول، په فرهنګي برخه کې هم زیات مثبت ګامونه پورته شوي دي.»
د اطلاعاتو او فرهنګ وزارت معین دغه راز وايي، په تېرو شلو کلونو کې د تاریخي ابدو د خونديتوب لپاره لکه څنګه چې لازمه وه هغسې کار نه دی شوی، خو زیاتوي چې له تېرو څلور کلونو راهیسې يې د خونديتوب لپاره بوديجه ځانګړې شوې.
چارواکي له نړیوالو غواړي چې له سیاسي مسایلو لرې دې له افغانستان سره د تاریخي او فرهنګي میراثونو په ساتلو کې همکاري ډېره کړي.
د اطلاعاتو او فرهنګ وزارت د فرهنګ او هنر معين عتیق الله عزیزي زیاتوي: « موږ په دې برخه کې له نړیوالې ټولنې څخه غوښتنه لرو چې له موږ سره همکاري وکړي او له سیاسي نزاکتونو او مسایلو هاخوا، له موږ سره همکاري او ګډ کار وکړي. په دې برخه کې هېڅ ډول بهانه جوي، تعلل او ځنډ نه شته.»
د دې څېړنیز سیمینار په ترڅ کې ځینو ګډونوالو د فرهنګي ميراثونو د ساتنې په موخه علمي مقالې وړاندې کړې، تر څو نورو هېوادونو ته د افغانستان فرهنګي اثار معرفي او په ساتنه کې يې د دوی همکاري جلب کړي.
د سمینار ګډونوال فرهنګي اثار د ټولنې ارزښتناکه شتمني او ساتل یې د خلکو او حکومت اړین مسوولیت بولي او زياتوي چې د پخوانيو جوماتونو او نورو فرهنګي ميراثونو خونديتوب کولی شي د يوې ټولنې هويت ژوندی وساتي.
