له پاکستانه د درملو وارداتو د محدودولو په اړه د حکومت له لارښوونې وروسته، تازه چارواکو د درملو توليدوونکو او واردوونکو شرکتونو ته د بې کيفيته درملو د عرضې په اړه خبرداری ورکړ.
د چارو ادارې ریيس د ملي پوهنتون له لوري د درملو د منطقي کارونې تر سرلیک لاندې دوه ورځني کنفرانس ته ويلي، حکومت په تېرو څلورو کالو کې د زیاتې اندازې بې کیفیته درملو پر سوځولو سربېره، په ګمرکونو کې هم د ورته کيفيت لرونکو درملو محصول ته اجازه نه ده ورکړې.
د چارو اداري ریيس نورالحق انور وايي: « اسلامي امارت قوانین وضع کړل او توشېح شول، دغو کسانو ته سختې سزاګانې ټاکل شوې دي. دا د اسلامي امارت د رهبرۍ لیدلوری دی. د قوانینو د توشېح په غونډه کې زه ناست وم؛ په قانون کې کوچنۍ سزاګانې وضع شوې وې، خو امر وشو چې سختې سزاګانې ورکړئ؛ ځکه هغه څوک چې بې کیفیته او جعلي درمل راوړي، دا یو انسان نه وژني بلکې د پوره ملت د تباهۍ اراده یې کړې.»
دا په داسې حال کې ده چې ځينې نور چارواکي بيا اعتراف کوي چې اوس هم روغتيايي مرکزونه مسلکي کسانو له کمبود سره مخ دي او زياتوي چې له دې امله د رامنځته شوې ستونزې حل لپاره زيات کار ته اړتيا ده.
د اقتصاد وزیر دین محمد حنيف وايي: « د هېواد د ودې او پرمختګ لپاره اړتیا ده چې د ښوونیز نظام او د کاري بازار د اړتیا ترمنځ فاصله کمه او وزګارتیا راکمه شي. همدارنګه د اقتصاد مهم سکټورونه تقویه شي او مهارت زده کوونکو ثبات نظام رامنځته شي. باید د کاري بازار علمي تحلیل وشي.»
د اقتصاد وزیر دغه راز وايي، یو شمېر ډاکټران خپلې نسخې په شفري ډول لیکي چې دې چارې خلک له ستونزو سره مخ کړي. بله خوا، د خصوصي سکټور استازي وايي، حکومت دې د درملو تولیدونکو او وارېدونکو شرکتونو او نورو پانګوالو ته اسانتیاوې رامنځته کړي. د دوی په خبره، پانګوال د برېښنا له کمبود او مالياتي ستونزو سره مخ دي.
د خصوصي پوهنتونونو د ټولنې ریيس خالد احمد حبیب وايي: « له مالیې وزارت څخه مو هیله دا ده چې د مالیې په برخه کې له سوداګرو، تعلیمي او تحصیلي سکټور او صحي سکټور سره مرسته وکړي او مالیات یې کم کړي، ترڅو دغه سکټورونه پر خپلو پښو ودرېږي. موږ به دا پيسې د یادو سکټورونو پر ودې او پرمختګ ولګوو، بیا که مالیات ډېر هم واخیستل شي، موږ ورته چمتو یو.»
د ماليي وزارت چارواکې بیا وايي، حکومت پانګوالو ته په ټولو برخو کې اسانتیاوې رامنځته کړې دي او لا هم هڅې روانې دي چي پاتې ستونزې يي حل کړي. د دوی په خبره، ګمرکونو کې ځانګړي ټېمونه ګمارل شوي، ترڅو هېواد ته د وارېدونکو موادو جدې پلټنه وکړي.
