د هرات ولایت حوزوي روغتون ډاکټران وايي، په روان ژمي کې د سړې هوا له کبله په ماشومانو کې د زکام، ټوخي، تنفسي او سینه بغل ناروغۍ زیاتې شوې دي.
د ډاکټرانو په خبره، د ژمي له پیل راهیسې تر اوسه هره ورځ له ۸۰۰ تر ۱۰۰۰ پورې ماشومان حوزوي روغتون ته ور وړل شوي او اکثریت یې په موسمي ناروغیو اخته دي.
د ډاکټرانو په وینا، د ماشومانو پاک ساتلو ته پام اړول، د دوی خوراک او څښاک ته پاملرنه او د خطرناکو ناروغیو په وړاندې یې واکسین کول خورا ضروري دي او کولی شي د ناروغنیو مخه ونیسي.
د هرات حوزوي روغتون د ماشومانو څانګې مسوول ډاکتر میرویس عابدي وايي: « د حوزوي روغتون د ماشومانو څانګې ته هره ورځ له ۸۰۰ تر ۱۰۰۰ تنو ماشومانو راوړل کېږي چې ډېر یې په تنفسي ناروغیو اخته وي. په دې ناروغیو کې له زکام نیولې تر سینه بغل پورې شاملې دي.»
په لرو پرتو سیمو کې د سمبال روغتیایي مرکزونو نه شتوالی بله اساسي ستونزه ده او له امله یې هرات ته هره ورځ د لوېدیځ زون له بېلابېلو ولایتونو څخه سلګونه ماشومان د درملنې لپاره ور وستل کېږي.
یو شمېره غه کسان چې خپل ماشومان یې د درملنې لپاره د هرات حوزوي روغتون ته راوستلي، دلته له وړاندې کېدونکو خدماتو خوښ دي، خو د پایوازانو لپاره د یوه مناسب ځای له نه شتوالي شکایت کوي.
له ناروغ سره مل کس یا پایواز نصیر احمد وايي: « دلته د پایوازانو لپاره هېڅ ډول امکانات نه شته. یوه کوټه ده چې د لس تنو ځای لري خو همدا اوس په کې تر ۲۵ ډېر کسان پراته دي. همدارنګه مسجد نه شته، تشنابونه نه شته او کوټې کمې دي. باید دا ستونزې حل شي.»
پایواز امامالدین وايي:« موږ دلته د تشناب نه شتوالي او د خوب لپاره د ځای له نه شتوالي له امله په تکلیف یو. له بلې خوا، هوا سړه او ډېری پایوازان په خپله هم ناروغ شوي. باید دلته د پایوازانو لپاره خونې جوړې شي.»
د هرات حوزوي روغتون ماشومانو څانګې ته په داسې حال کې د ورځې تر زرو پورې ناروغ ماشومان راوړل کېږي چې د روغتون د ماشومانو څانګه یوازي د ۱۰۰ تنو ماشومانو د بسترولو ظرفیت لري.
د روغتون مسوولان وایي، تمه لري هرات کې د ماشومانو ځانګړي روغتون جوړېدو سره به دا ستونزه حل شي.
