د عامي روغتیا وزارت له خوا نړیوالو سازمانونو، مرستندویه موسسو او ولايتي ریيسانو سره د همغږۍ او ظرفیت لوړونې په موخه درې ورځنی ورکشاپ جوړ شو. د دې ورکشاپ موخه په ولایتونو کې د خلکو پر اړتياوو سربېره د روغتیايي ستونزو تشخيصول او ورته د حل لارو لټول دي.
روغتیايي چارواکي مني چې په يو شمېر ولايتونو کې روغتيايي ستونزې شته، خو د دوی په خبره د مخنيوي لپاره يې نړيوالې مرستې خورا مهې دي.
دوی دغه راز د هېواد په ټولو زونونو کې د سرطاني ناروغيو د درملنې لپاره د روغتونونو جوړولو په تړاو د هڅو له پيل خبر ورکوي او زياتوي، دا روغتونونه به په بشپړه توګه په عصري وسايلو سمبال وي.
د عامې روغتیا وزیر نورجلال جلالي وايي: « تاسو باید د هرې موسسې او انجیو چې د هر ډول پروژې پلې کوونکې وي، پروپوزل، قرارداد او تفاهم لیک وغواړئ. باید تخنیکي چارې او د خدماتو وړاندې کول یې په ښه توګه و ارزوئ. که چېرې د دې موسسو فعالیت د ډاډ وړ نه و او منابع یې ضایع کولې، باید وزارت پرې خبر کړی او فعالیت یې ودروی.»
په ورته مهال، د ماشومانو ملاتړ لپاره د ملګرو ملتونو وجهي صندوق(يونیسف) وايي، په افغانستان کې د ماشومانو د فلج یا ګوزڼ ناروغي لا هم په بشپړه توګه نه ده محوه شوې.
استازی يې د روغتيا له سکټور سره د مرستو ډاډ ورکوي او زياتوي، د ګوزڼ له منځه وړلو په برخه کې به هم له عامې روغتيا وزارت سره ګډ کار ته دوام ورکړي.
افغانستان کې د یونیسف استازی تاجالدین اويوالي وايي: « متاسفانه باید ووایم چې افغانستان لا هم د هغو هېوادونو په ډله کې دی چې ګوزڼ په کې شته دی. موږ او تاسو به په ګډه د دې ناروغۍ له منځه وړلو هڅې ګړندۍ ساتو. موږ ډاډ درکوو چې په روغتیايي برخه کې به موږ او نور مرستندوی بنسټونه خپلو مرستو ته دوام ورکړو.»
بله خوا د روغتیا نړیوال سازمان موندنې ښيي چې د جنوبي او جنوب لوېدیځو ولايتونو اړوند ځينو سيمو کې لا هم يو شمېر ماشومان له ګوزڼ ضد واکسين بې برخې پاتې دي او همدا د دې سبب شوی چې په افغانستان کې د ګوزڼ ناروغي په دوامداره توګه پاتې شي.
افغانستان کې د روغتیا نړیوال سازمان استازی خوشحال زمان وايي: « باید ووایم چې د افغانستان په جنوب او جنوب لوېدیځو ولایتونو کې داسې سیمې شته چې په کې د پولیو واکسین ماشومانو ته په سمه توګه نه رسېږي او ماشومان له واکسين پاتې کېږي. دا ستونزه د دې لامل شوې چې په افغانستان کې پولیو په دوام داره توګه پاتې شي. د دې ناروغۍ له منځه وړلو لپاره ګډ او دوامدار کار ته اړتيا ده.»
د دې ورکشاپ په لومړۍ ورځ له خلکو وغوښتل شول چې په خپلو سيمو کې د ګوزڼ ضد واکسين له تطبيق کوونکو سره همکاري وکړي او ترڅنګ یې د عامې روغتيا ولايتي ریيسانو ته هم لارښوونه وشوه چې د ياد واکسين د تطبيق پروسه له نږدې وڅاري، ترڅو ماشومان ترې بې برخې پاتې نه شي.
