د تېرو څو کلونو په پرتله په هرات کې د ماشومانو د سرخکانو یا شري ناروغي زياته شوې ده. د بې پولې ډاکټرانو سازمان موندنې ښيي چې هرات کې روان کال د شري ناروغي پنځوس سلنه زياته شوې او په دې موده کې څه باندې ۱۷۰۰ ماشومان پرې اخته شوي دي.
د دې سازمان په خبره، په هرات کې پر شري اخته ماشومانو ۶۷ سلنه له يوه کال کم عمر لرونکي دي او له ډلې يې پنځه سلنه ماشومانو ژوند هم بايللی.
د هرات حوزوي روغتون کې د بې پولې ډاکترانو مسوول حمیدالله ساغري وايي: « د روان کال په اوږدو کې ټولټال ۱ زره ۷۰۰ ناروغان د درملنې تر پوښښ لاندې نیولي چې ډېره برخه یانې ۶۷ سلنه یې له یوه کال څخه کوچني ماشومان وو. له نېکه مرغه ډېره مړینه مو نه لرله او د ناروغۍ شدت ته په کتو یوازې پنځه فیصده وه.»
مسوول ډاکټران د خلکو ترمنځ د عامه پوهاوي کموالی، بېووزلي او ککړ چاپېريال په هرات کې د شري د زياتوالي لوی لاملونه بولي.
حمیدالله ساغري زیاتوي: « خلک خپل ماشومان نه واکسینوي. کله چې ماشومان واکسین نه شي، پېښې زیاتېږي او د دې لامل کېږي چې لا ډېر ماشومان پرې اخته شي. دا کار ډېر دلایل لري، لکه بې سوادي، بېوزلي، د پاکۍ نه رعایتول او نور عوامل د دې ناروغۍ د خپرېدو سبب کېږي.»
بله خوا، د هرات اوسېدونکي وایي، که څه هم د ماشومانو درملنې لپاره یې په دې ولايت کې اسانتياوې شته، خو د پایوازانو لپاره د مناسب ځای نه شتون او سړه هوا سبب شوې چې له ستونزو سره مخ شي او یو شمېر کسان روغتون ته د خپلو ماشومانو له وړلو ډډه وکړي.
د محمد خان په نوم د هرات اوسېدونکی وايي: « موږ د روغتون مشرانو ته ورغلو او ورته مو وویل چې موږ ته یوڅه راکړي، یو کانټینر را خلاص کړي، دلته کانټینرونه شته خو دروازې یې بندې دي. هوا سړه ده او زموږ وضعیت هم ورسره خراب دی، داسې چې لویان هم ناروغان شول. ۱۵ ورځې کېږي چې زما ماشوم ناروغ دی او زه دلته په سیمنټو ورته پروت یم.»
د هرات اوسېدونکی رمضان په دې اړه وايي: « ماشومان ښه دي خو زموږ ځای دلته د باندې ډېر خراب دی. درې ورځې کېږي دلته یم، د خدای شکر دی ماشومانو ته ښه رسیدګي کېږي.»
د بې پولي ډاکترانو له معلوماتو سره سم، د هرات حوزوي روغتون ته په شري اخته راوړل شویو ماشومانو۷۶ سلنه د هرات او پاتي نور یې د بادغیس او فراه ولایتونو دي. د دوی په خبره، سږ کال د دغو ناروغانو لپاره ۱۰ زره ډوزه د شري واکسین هم چمتو شوی دی.
