پر ناروغیو د اخته کېدو عوامل ګڼ دي، خو که په وخت ورته پاملرنه ونه شي، ناروغ او کورنۍ له ډېرو ستونزو سره مخ کولی شي.
د بلخ ابوعلي سینا روغتون ډاکټران وايي، د روان لمریز کال په لومړیو اتو میاشتو کې پر رواني ناروغیو اخته شاو خوا ۱۷ زره کسانو مراجعه کړې.
د دوی په خبره، دغو ناروغانو کې ۱۱ زره يې ښځینه دي.
د بلخ ابوعلي سینا روغتون رواني ناروغۍ د درملنې څانګې متخصص ډاکټر اسدالله الفت وايي: « د ۱۴۰۴ کال په تېرو ۷ میاشتو کې ټولټال ۱۷ زره ۸۰۰ تنو مراجعه کړې چې له ډلې یې ځينې کسان بستر شوي او نور رخصت شوي دي. همدارنګه له دې ډلې ۵ زره ۹۶۹ تنه نارینه او ۱۱ زره ۶۹۰ تنې هم ښځې وې.»
که څه هم کمزوری اقتصادي وضعیت، ګاز لرونکو مشروباتو کارول، له حده ډېر مسوولیتونه لرل يې عوامل بلل کېږي، خو روغتیا پالان سپارښتنه کوي چې له اندېښنو ځان ساتل او ډېر فکر نه کول يې د درملنې لپاره غوره لارې دي.
د رواني ناروغیو درملنې څانګې ډاکټر داود عاصم وايي: «لاملونه یې تر ډېره د دوی په شاوخوا کسانو او چاپېریال پورې اړه لري. همدارنګه د دوی غذايي رژیم هم موږ ته ډېر اهمیت لري.»
د رواني ناروغیو د درملنې څانګې ډاکټر امیر محمد نیازی وايي: « رواني ناروغۍ اوس د نړۍ په کچه هم د ناروغیو ډېره برخه جوړوي. د دې ډول ناروغانو د درملنې لپاره باید ښه ټولنیز ژوند ولري او د کورنۍ له خوا یې ملاتړ وشي.»
د دغو ناروغانو پایوازان یاده برخه کې خدمات تر نورو مهم بولي او ټینګار کوي چې روغتونو کې دې ورته پاملرنه جدي شي.
د یوه ناروغ پایوال سید علي وايي: « خدمات ښه دي او رسېدنه کېږي، خو د معایناتو په برخه کې څه ستونزې شته، قېمتونه یې د بهر په پرتله لوړ دي.»
پایواز احمد شاه وايي: « ډاکټران په خپل وخت راځي او ناروغان ګوري، څه ستونزه نه شته.»
د ډاکټرانو د معلوماتو پر بنسټ، د سږکال تېرو اتو میاشتو کې د مغزي سکتې پر ناروغۍ هم څه باندې زر تنه ناروغانو ورته مراجعه کړې چې له دې شمېر ۱۲۴ تنو ژوند له لاسه ورکړی.
