د ملګرو ملتونو د بشري مرستو همغږۍ ادارې (اوچا) خبرداری ورکړی، که لازمه بودیجه ترلاسه نه کړي، په افغانستان کې به سږ کال په میلیونونو کسان له روغتیایي خدمتونو بې برخې شي.
اوچا پر خپله ټویټر پاڼه لیکلي، چې ۳.۷ میلیونه وګړي به د ژوند ژغورنې له له لومړنیو روغتیایي خدمتونو بې برخې شي.
د یادې ادارې د مالوماتو له مخې، یو اعشاریه ۵ میلیونه وګړو ته به په ۹۴ ولسوالیو کې د ژمي پر مهال روغتیایي خدمتونه ونه رسېږي.
اوچا زیاته کړې، ۲۹۶ زره امیندوارې او شیدې ورکوونکې ښځې به د امیندوارۍ، د ماشوم د زېږون او له زېږون وروسته د مور او ماشوم له روغتیایي خدمتونو بې برخې شي.
دغه راز اوچا ویلي چې له یو کال کمعمره ۱۴۸ زره ماشومان به هم له واکسین پاتې شي.
اخوا د روغتیا نړیوال سازمان بیا ویلي، د دې لپاره چې په افغانستان کې لومړنۍ روغتیايي اړتیاوې پوره کړی شي، د سږ کال په پاتې میاشتو کې ۱۲۵ میلیون ډالرو ته اړتیا ده.
