Skip to content
د ملګرو ملتونو بشري مرستو همغږۍ ادارې (اوچا) افغانستان کې د عامو افغانانو او په ځانګړې توګه د ماشومانو پر روغتیایي وضعیت اندېښنه ښودلې او له نړیوالو یې دې برخې د پاملرنې غوښتنه کړې ده.
اوچا پر خپله ټویټرپاڼه لیکلي،د افغانستان روان بشري او اقتصادي ناورین ته وروستیو طبیعي پېښو، لسیزو جګړو او اقتصادي ضربو لا لمن وهلې ده.
اوچا زیاته کړې:« د افغانستان پر کچه د خوارځواکۍ شمېرې لا هم په لوړه کچه دي. دا وضعیت د تېرو لسیزو جګړو، اقتصادي ضربو او طبیعي پېښو راوروسته ډېر خراب شوی دی. د خوارځواکۍ د مخنیوي او درملنې لپاره لا ډېرو نړیوالو مالي مرستو ته اړتیا ده.»
اوچا ویلي، په افغانستان کې سخت ژمی پیل شوی او د توکو بیې هم خورا لوړې شوي دي، چې د خلکو ورځنۍ ژوند یې سخت کړی دی.
دغه راز اوچا ویلي،افغانستان کې ۲۴ اعشاریه ۴ میلیونه خلک د ژمي پر مهال سرپناه، تودو جامو او د کورونو د تودولو لپاره نغدو پیسو ته اړتیا لري.
اوچا زیاتوي:«په افغانستان کې میلیونونه خلک او په ځانګړې ډول ښځې له داسې سخت وضعیت سره مخ دي،چې د روان اقتصادي ناورین له امله د خپلو کورنیو ورځنۍ اړتیاوې نه شي پوره کولی. راروان ژمی به د دې خلکو ژوند لا پسې سخت کړي. د ملګرو ملتونو ادارې او متحدین په دې کار کوي،ترڅو اقتصادي فرصتونه رامنځته کړي او د ښځو د پیاوړتیا لپاره مالي مرستې وکړي.»
افغانستان کې که څه هم د هوا په سړېدو سره د بېوزله خلکو ژوند ډېر سخت کیږي،خو سږ کال به د دې خلکو شمېر ځکه زیات وي،چې هېواد کې کاري فرصتونه کم او د خوراکي او سون توکو بیې لوړې دي.
ملګري ملتونه وایي،ډېری افغانې کورنۍ اوس یوازې دوه ټاکنې لري،چې د خپلو ماشومانو خیټې مړې کړې او که خونې ورته تودې کړي.
