افغانستان یو له هغو هېوادونو دی چې د سوري زړه پر ناروغۍ په کې اخته ماشومانو شمېر زيات دی او ډېر کله دغه ماشومان د درملنې لپاره بهر په ځانګړې توګه جرمني ته لېږل کېږي.
تازه د عامې روغتیا وزارت په صحت طفل یا اندراګاندي روغتون کې د يادو ناروغانو د درملنې لپاره د ۱۱۸ ميليونه افغانيو په لګښت ځانګړی واټ پرانېست. د دې وزارت چارواکي وايي، دغه څانګه به ۵۰ بستره او دوه عملیات خونې ولري او په ورځنۍ توګه به په کې د سوري زړه پر ناروغۍ اخته ماشومانو ۴ عمليات ترسره کېږي.
د چارواکو په خبره، لا هم په سوري زړه ناروغۍ اخته ۱۴ زرو ماشومان د درملنې په تمه دي.
د عامې روغتيا وزارت معالجوي طب رییس وحدت الکوزی وايي: « دا څانګه د ۵۰ بسترو په اندازه ظرفیت لري او ۲ عملیات خانې لري چې کولی شو په اوسط ډول هره ورځ ۴ د زړه جراحۍ عملیات ترسره کړو. دغه قلبي واټ او عملیات خونې په مجهزو او عصري وسایلو سمبال دي.»
نوموړی زیاتوي، د دې څانګې له فعالېدو سره به د اکمال تخصص برخه هم فعاله شي، ترڅو مسلکي کسان په کې و روزل شي.
په ورته مهال، نور چارواکي وايي، که څه هم نړیوالو له روغتیايي سکټور سره خپلی مرستې کمې کړې دي، خو حکومت له خپلو عوایدو د روغتیا سکټور تر پخوا ښه په پښو درولی او هڅه کوي چې لرې پرتو سیمو ته هم خدمات ورسوي.
د چارواکو په خبره، په یاد روغتون کي به په کلني ډول د سلګونو ناروغانو درملنه کېږي او ټول اړین امکانات به په واک کې ورکړل شي.
د عامې روغتیا وزیر نور جلال جلالي وايي: « تاسو وګورئ، موږ له نړیوالو بندیزونو سره مخ یو، زېرمې مو کنګل دي، بانکي سیسټمونه مو تر بندیزونو لاندې دي، خو بیا هم له خپلو موجوده منابعو څخه په کارولو وتوانېدو چې د طبابت په برخه کې ستر او تاریخي ګام پورته کړو. ستاسو به یاد وي، کله چې د سره صلیب ادارې په ناڅاپي ډول زموږ له روغتونونو او روغتیايي مرکزونو څخه لاس واخیست، د عامې روغتیا وزارت وتوانېده چې د دوی تر پوښښ لاندې روغتونونو روغتیايي پرسونل چې تعداد یې د ۱۰ زرو تنو په شاوخوا کې و، له معاش نیولې تر نورو روغتیايي او درملیزو توکو پورې، ټولې اړتیاوې له حکومتي بودیجې تمویل کړي.»
د عامي روغتیا وزیر دغه راز وايي، دا چې د افغانستان د خلکو اقتصادي وضیعت ښه نه دی او نه شي کولی خپل ناروغان له هېواد څخه بهر انتقال کړي، نو یاد روغتون به د درملنې په برخه کی زیاتې اسانتیاوې رامنځته کړي.
له بلې خوا، د بهرنیو چارو وزیر له نړیوالو غواړي چی روغتیايي سکټور دې له سیاست سره نه تړي او په دې برخه کې دې د افغانستان له خلکو سره مرستې جاري وساتي.
امیرخان متقي زیاتوي، ځینې کسان د افغانستان د روغتيايي سیسټم پر وړاندې منفې تبلیغات کوي، خو دا کسان به هېڅ وخت خپلو موخو ته ونه رسېږي.
د بهرنیو چارو وزیر امیرخان متقي وايي: « له نړیوالو مرستندویه سازمانونو، موسسو او هېوادونو زموږ جدي غوښتنه دا ده چې بشري موضوعات د له سیاست سره نه ګډوي او دغه راز هڅه دې وشي چې مرستې پراختیايي مرستو ته واوړي، ترڅو دلته زیربناوې تقویه شي، ترڅو بنیادي کارونه وشي او زموږ خلک په خپل کور کې هوسا شي.»
چارواکي دا هم وايي چې هڅه کوي د سوري زړه پر ناروغۍ د اخته ماشومانو درملنې لپاره په ولایتونو کې هم ورته څانګې پرانیزي او درملنه يي وکړي.
