Skip to content
افغانستان کې د روغتیا نړیوال سازمان مشر ډاکټر ډیپينګ لو وایي، روان ۲۰۲۲ زېږدیز کال په دغه هېواد کې د ګوزڼ له منځه وړلو لپاره تر ټولو غوره کال دی او په پام کې لري،چې سږ کال د پولیو واکسین پنځه سراسري کمپاینونه ترسره کړي.
ډاکټر لو وایي، افغانستان د ګوزڼ ناروغۍ له منځه وړلو ته ډې نږدې شوی او اړتیا ده،چې دلته له پنځه کلونو کمر عمره هر ماشوم ته د پولیو واکسین دوه څاڅکي ولګول شي.
ډاکټر لو زیاتوي:«موږ د ۲۰۲۲ زېږدیز کال په راتګ سره په افغانستان کې د پولیو وېروس د له منځه وړلو لپاره تر ټولو ښه فرصت لرو.موږ دې هدف ته د رسیدو لپاره، په ۲۰۲۲ کې د پولیو واکسین پنځه نور کمپاینونه هم په نظر کې لرو او دا مهمه ده،چې اوسنی حرکت همداسې جاري وساتو، تر څو د مثبتو پیښو بشپړ ختمولو ته، چې زموږ وروستی هدف دی، ځان ورسوو.»
اخوا په افغانستان کې د ملګروملتونو د ماشومانو ملاتړ صندوق یا یونیسف مسوولینو ویلي، د ګوزڼ له منځه وړلو کې سیمه ییز واکسیناتوران تر ټولو مهمه ونډه لري او له مشرانو یې غوښتي،چې د هغوی د خوندیتوب لپاره دې هڅې چټکې کړي.
اخوا عامې روغتیا وزارت وايي، د هېواد په ۳۱ ولایتونو کې یې د ۲۰۲۲ کال د پولیو واکسین لومړنی څلور ورځینی کمپاین پیل شوی،چې د پنج شنبې پر ورځ به پای ته ورسېږي.
اسلامي امارت له دې وړاندې ویلي وو،چې دا په تېرو شلو کلونو کې لومړی ځل دی،چې د ټول هېواد پر کچه به د ګوزڼ واکسین تطبیق کېږي،خو روغتیا وزارت اوس وایي چې په دایکندي، بامیان او غور کې د واورو له امله د دې اوونۍ کمپاین نه تطبییق کېږي.
د یاد وزارت ویاند عبدالرحمان زیرک وايي:« د ۲۰۲۲ کال لپاره د پولیو کمپاین لومړی دوره د دوشنبې پر ورځ پیل شوه. دا کمپاین به څلور ورځې دوام وکړي. ټاکل شوې ده،په دې کمپاین کې په ۳۱ ولایتونو کې ۹.۵ میلیونه هغه ماشومان چې عمرونه یې له پنځو کالونو کم وي، واکسین شي. درې ولایتونه غور، دایکندي او بامیان په دې کمپاین کې د واورې اورېدو او سړې هوا له امله شامل نه دي.»
د مالوماتو له مخې، تېر کال په افغانستان کې د پولیو تر ټولو کمې څلور مثبتې پېښې ثبت شوې وې،چې یوه یې په غزني او درې نورې یې په کندز ولایت کې وې.
