د اروزګان ولایت خلک له تېرو څو لسیزو راهیسې له روغتیایي خدمتونو بې برخې وو چې ورسره د مور او ماشوم مړینه هم ډېره شوې وه.
خو اوس د یاد ولايت د عامې روغتیا مشر ډاکټر محمدالله روحاني وايي، د پخوا پرتله اروزګان کې د مور او ماشوم د مړينې په کچه کې د پام وړ کموالی راغلی دی.
د روحاني په خبره، لري پرتو سيمو ته د روغتيايي خدمتونو غځيدل د دې لامل شوي چې د مور او ماشوم د مړيني کچه کمه شي.
روحاني زیاتوي: « د مور او ماشوم مړینه خو اوس د پخوا پرتله بیخي ډېره کمه شوې، ځکه چې په هره ساحه او هر کلي کې کلنیک شته او له نېکه مرغه په ټولو کلنیکو کې موږ زنانه ډاکټرانې لرو او ناروغانو ته ولادت ورکوي. مخکې به زنانه ډاکټرانې کمې وې او د کلنیکونو د کموالي ستونزه وه، اوس په ټولو ساحو کې الحمدالله کلینکونه شته او ستونزه حل ده، له لسو تر شلو کلینکونه جوړ شوې دي چې دا هم یوه لاسته راوړنه ده او د مړینې د کچې په کمولو کې یې مثبته اغېزه کړې.»
په ورته وخت کې يو شمير مېندې هم وايي، د پخوا پرتله يې روغتيايي مرکزونو ته لاس رسی زيات شوی دی او ډېر ولادوتونه په روغتيايي مرکزونو کې ترسره کيږي.
د چورې ولسوالۍ یوه اوسېدونکې ګل دانه وایي: « اوس ډېری ولادتونه په کلنیکونو کې ترسره کېږي، ولسوالۍ کې کلنیکونه شته که ډېره ستونزه وي بیا هم تر خپلې سیمې بلې خوا ته اړتیا نه ده پېښه شوې.»
اخوا د اروزګان اوسېدونکي وايي، خوښ دي چې په دي وروستیو کي د مور او ماشوم په مړینه کي کموالي راغلی خو غوښتنه کوي چې دې برخې ته دي روغتيايي مسوولين پاملرنه زياته کړي.
د اروزګان یو اوسېدونکی محمد صدیق وايي: « تر ډېره حده د مړینې کچه را ټيټه شوې ده، ځکه خلک په اسانۍ کولی شي له ولسوالۍ څخه مرکز ته راشي او پر وخت رسېدنه ورته کېږي او له ډاکټره سالمې مشورې ترلاسه کولی شي .»
د اروزګان یو بل اوسېدونکی بیا وايي: « د پخوا پرتله د مور او ماشوم مړینه ډېره کمه شوې، ځکه پخوا به لارې بندې وې، ناروغ پر وخت روغتون ته نه رسېده او اوس دا ستونزه حل شوې ده، موږ هېله لرو چې کوم روغتونونه غېر فعال دي هغه هم راته فعاله کړي.»
اروزګان ولایت کې داسې مهال ځايي مسوولين د مور او ماشوم د مړينې د کمښت خبر ورکوي چې تازه دي ولايت کې ۱۵ نوي روغتيايي مرکزونه جوړيږي چې ډېر خدمات به يې د ولادتونو ترسره کيدو برخه کې وي.
