د روغتیا نړیوال سازمان: پکتیکا او خوست کې د زلزله ځپلو سېمو ډېری اوسېدونکي په ډول ډول ناروغیو اخته شوي 

د تیرو دوه لسیزو تر ټوله سخته زلزله،چې له امله یې په زرګونو کسان په خوست او پکتیکا ولایتونو کې مړه او ژوبل شول، د میلیونونه ډالرو مرستو سره لا هم ګڼ شمیر خلک له ستونزو سره مخ دي.  

د روغیا نړیوال ساز مان  له لوري په خپور شوي راپور کې ویل شوي،د دغې زلزلې له امله له ۳۵۰ زره زیات کسان او په زرګونو کورونه زیامن شوي دي او بېړنیو مرستو ته اړتیا لري. 

د راپور یوه برخه:« د افغانستان په سویلي ولایتونو خوست او پکتیکا کې د وروستۍ زلزلې له امله ټول ۳۶۱۳۳۴ وګړي زیانمن شوي،چې له ډلې یې ۱۰۳۶ کسان مړه شوي او تر دې دمه ۶۰۸۳ وبل دي. ددې تر څنګ لږ تر لږه ۴۵۰۰ بابه کورونه زیانمن شوي،چې زیات شمیر یې په بشپړه توګه نړیدلي دي.» 

دغه راز په راپور کې ویل شوي، لا هم زیات شمیر وګړي بې سر پناه دي،چې د څښاک اوبو او خوراکې توکه ته لاس رسی نه لري او له امله یې ساري ناروغۍ په سیمه کې زیاتې شوي دي.

د راپور یوه برخه:« د پکتیکا په برمل او ګيان او د خوست په سپیرې ولسوالۍ کې اوس هم سلګونه کورنۍ پرته له سرپناه له کورونو بیرون ژوند کوي. دغه وګړي پاکو خوړو او د څښاک اوبو ته د نه لاسرسي له امله سخت وضعیت تجربه کوي او له امله یې د ساري نارغیو لکه اسهال یا کولرا او د ملاریا له لوړ خطر سره مخ دي.» 

راپور کې وړاندې ویل شوي،چې سیمو ته یې روغتیایې ټیمونه لیږلي،خو دا چې وکولی شي د نویو ناروغیو سره ښه مبارزه وکړي زیاتې بودیجې ته اړتیا لري او د مرستې غوښتنه یې کړې ده.

د راپور یوه برخه:«د  روغتیا کلستر لږ تر لږه ۶ میلیونه ډالرو ته اړتیا لري،ترڅو وکولای شو،په لومړیو درې میاشتو کې د خوست او پکتیکا اغیزمنو خلکو سره بېړنۍ او اړینې روغتیايي مرستې وکړي. د روغتیا نړیوال سازمان په دې برخه کې تر اوسه پورې یوازې ۱.۲۵ میلیونه ډالر ترلاسه کړي،په داسې حال کې چې ۴.۷۵ میلیونه ډالرو ته لا هم اړتیا شته دی.» 

که څه هم له وړاندې دغه سیمې د روغتیايي خدمتونو له کمښت سره مخ وې او وګړي یې د بېلا بېلو  ناروغیو له  امله کړیدل،خو له زلزلې وروسته دغه ستونزه زیاته شوې،چې د سیمې د اوسېدونکو تر څنګ د روغتیا نړیوال سازمان یې هم اندیښمن کړی.