د پکتیا ولایت څمکنیو ولسوالۍ د مندیخېلو کلي کې د پاکستان پوځي رژیم د ړندې بمبارۍ یو شمېر ټپیان د درملنې لپاره د مرکز کابل شهید سردار محمد داوود خان روغتون ملکي څانګې ته لېږدول شوي.
ډاکټران د ټولټال لېږدول شویو ټپیانو شمېر۲۵ تنه یادوي او وايي، له ډلې یې د ۱۲ تنو روغتیايي وضعیت نازک دی او دا مهال د ځانګړې پاملرنې څانګه(آیسيیو) کې تر جدي مراقبتونو لاندې دي.
د ډاکټرانو په خبره، په لومړي سر کې یې همدې عاجلو ټپیانو ته رسېدنه کړې او پر وخت اقداماتو سره یې دامهال وضعیت د ډاډ وړ دی.
د شهید سردار محمد داوود خان روغتون متخصص ډاکټر سید هارون هاشمي وايي: « زموږ روغتون ته د تېرې شپې له برید څخه ۲۵ تنه ټپیان راوړل شوي چې له ډلې یې د زیاتو روغتیايي حالت نازک دی. له موږ سره اوسمهال ۱۳ تنه په آیسيیو کې پراته دي؛ له دو سره لازمې مرستې شوې او ځینې لاهم تر عملیاتو لاندې دي. که څه هم د ځینو حالت ښه شوی، خو ځینې نور لاهم په نازک حالت کې دي.»
د پېښې ټپیان د تېرې شپې کیسه کوي او وايي، د پاکستان جېټ الوتکو تېره شپه د ملکي سیمو تر یوځل بمبارۍ وروسته، بیاځل راګرځېدلې او پرهغو کسانو یې بمونه غورځولي چې د دوی د کړي وحشت د قربانیانو مرستې او ژغورنې ته ورغلي وو.
د مجاهد په نوم د پېښې یوتن ټپي وايي: « نیمه شپه په داسې حال کې چې خلک په خوب ویده وو، پاکستاني الوتکو بمونه واچول. کله چې خلک د دې نښه شوي کور د مړو او ټپیانو ایستلو ته ورغلل، الوتکو بیا بمبار وکړ او ډېر کسان یې شهیدان کړل.»
د پېښې بر ټپي صمیم وايي: « د شپې ۱۲ بجې وې چې بمبار وشو. زموږ له کلي څخه پنځه دقیقې مزل و. په جوماتونو کې اعلانونه وشول چې خلک مرستې ته ورشي، موږ هم ژغورنې ته لاړو، خو پنځه دقیقې وروسته بیا بمبار وشو.»
د سیمې اوسېدونکي اوعیني شاهدان چې له ټپیانو سره له یاد ولایت څخه دې روغتون ته راغلي وايي، د پېښې ډېری تلفات له لومړي برید وروسته سیمې ته پر ورغلیو مرسته کوونکو او عامو خلکو له دویم ځل برید سره لوړ شوي.
د پېښې عیني شاهد حیات الله نوري وايي: « په دې سیمه کې هېڅ ډول نظامي ځای نه شته او نه دا خلک نظامیان دي. دا خلک ټول ملکي وګړي او بزګران دي. په دې کسانو کې ښځې، ماشومان او بوډاګان هم شامل دي.»
مسوولان وايي، د پکتیا د څمکنیو ولسوالۍ د برید ټپیان یې د مرکز ترڅنګ د دې ولایت مرکز ګرېز روغتونونو ته هم انتقال کړي دي.
دا داسې مهال ده چې د پاکستان پوځي رژیم جېټ الوتکو تېره شپه شاوخوا دولس بجې د پکیتا، پکتیکا او کونړ ولایتونو کې ملکي سیمې بمبار کړې چې په پایله کې یې د ښځو او ماشومانو په ګډون تر دې دمه ۳۶ کسان شهیدان او ۱۶۳ تنه نور ټپیان شوي دي.
