تنباکو د روغتيا لپاره تر ډېره هغه مضر بوټی دی چې پر افغانستان سربېره د نړۍ په ګوټ ګوټ کې يې خلک پر کارولو روږدي دي.
د مې ۳۱ مه همدې بوټي ته د نه ویلو له نړیوالې ورځې سره برابره ده.
په دې تړاو د روغتیا نړیوال سازمان وايي، خلک یې د تنباکو په ضد ګډې مبارزې ته رابللي او وايي، له مخنیوي سره سم به یې له لوګي پاک چاپېریال رامنځته شي.
افغانستان کې د دې سازمان استازی وايي، د تنباکو صنعت خپل وژونکي زیانونه د غولوونکو تکتیکونو او خوږو خوندونو تر شا پټوي.
اډوین سینیزا سلواډور زیاته کړې: « د تنباکو له زیانونو څخه د افغانستان او خلکو ژغورل یو ګډ مسوولیت دی. د تنباکو د اصلي څېرې بربنډول د افغانستان لپاره د یوه روغ رمټ راتلونکي غوره کول دي. راځئ چې ټول یو ځای شو، ترڅو د خپلې ټولنې ساتنه وکړو او له لوګي څخه پاک چاپېریال رامنځته کړو او د هر افغان ژوند خوندي کړو.))
په ورته مهال، د روغتیا نړیوال سازمان په دې تړاو پر خپله اېکس پاڼه لیکلي، د تنباکو او نیکوټین تولیدوونکي شرکتونه خپل محصولات قصداً داسې جوړوي چې خلک ژر پرې روږدي شي.
د روغتیا نړيوال سازمان ویلي: « پر تنباکو د روږدي کېدو کړۍ ماتېدلی شي او ګټې یې نږدې سملاسي احساسېږي. د تنباکو او نیکوټین تولیدوونکي شرکتونه خپل محصولات قصداً داسې ډیزاینوي چې تاسې پرې روږدي کړي. قندي مواد، خوندونه او یخوونکي مواد، دا ټول د نیکوټین تریخوالی او تندوالی پټوي، ترڅو تاسو ډېر لوګی تنفس کړئ او ژر پرې روږدي شئ.»
بله خوا، ډاکټران وایي د تنباکو کارول د ستوني، سږو او تنفسي ناروغۍ رامنځته کوي چې که څه هم د لنډ مهال لپاره د انسان د ارامتیا لامل ګرځي، خو په تدریجي ډول يې ان د مړینې سبب ګرځي.
ډاکټر کمین ساپی وايي: « د تنباکو کارول تر ټولو وړاندې تنفسي مجرا ته ستونزې جوړوي، ستونی تخریشوي او بیا سږو ته ستونزې جوړوي. د تنباکو له امله نه یوازې د سینې اړوند ناورغۍ او نفس تنګي رامنځته کېږي بلکې تنفسي سیسټم کې ډېر پېچلي انتانات او داسې سرطاني ناروغۍ پیدا کوي چې یا یې په ډېره سختۍ درملنه کېږي او یا هم لا علاجه دي.»
د روغتیا نړيوال سازمان د شمېرو له مخې، د نړۍ ۶۰ سلنه هغه خلک چې تنباکو کاروي، دا هیله څرګندوي چې کاش دا یې پرېښودلی شوای. همدا راز دې سازمان زيات کړې چې اوس مهال په نړۍ کې ټولټال۷۵۰ مییلیونه کسان تنباکو استعمالوي.
