په مزار شریف ښار او ولسوالیو کې د بلخ عامې روغتیا ریاست له خوا د لوی اختر په را رسېدو سره سم، د کانګو ناروغۍ د مخنیوي په موخه د عامه پوهاوي یو ورځنی کمپاین پیل شو.
د بلخ روغتیايي مسوولین وایي، د اختر په ورځو کې د څارویو قرباني کېدو سره د کانګو ناروغۍ د خپرېدو ګواښ کچه لوړېږي.
دوی وايي، د دې کمپاین موخه داده چې خلک د قربانۍ ذبح کولو پرمهال روغتیايي سپارښتنې مراعت کړي او د دستکشو او ماسک په څېر محافظتي وسایل وکاروي.
د بلخ عامې روغتیا ریاست د ساري ناروغیو کنټرول آمر ډاکټر منصور ساویز وايي: « کانګو تبه یوه شدیده ساري ویروسي ناروغي ده چې له څارویو څخه انسان او له انسان څخه انسان ته سرایت کوي. په لوی اختر کې د دې ناورغۍ خپرېدلو امکان ډېر وي او له همد ې امله د بلخ ولایت د عامې روغتیا ریاست د خلکو د پوهاوي لپاره کمپاین پيلوي. په دې کمپاین کې به د مزار ښار په ټولو ناحیو او دغه راز د بلخ ولایت په ټولو ولسوالیو کې له خلکو سره ناستې جوړې شي او په ترڅ کې به یې د خبرو، بنرونو او بروشورونو له لارې خلکو ته له دې ناورغۍ د خوندیتوب لارې ورښودل شي.»
بله خوا، د مزارشریف ښار اوسېدونکي د کانګو ناروغۍ د مخنیوي پر وړاندې دا کمپاین ګټور بولي او زیاتوي چې په یاده برخه کې اړتیا ته په کتو دې دغه کمپاین تر اختره دوام وکړي.
د مزار شريف اوسېدونکی عاقب نسیمي وايي: « زه له دې کمپاین ډېر خوښ یم، دا چې لوی اختر را نږدې دی، خلک باید د څارویو حلالولو پرمهال په دې پوه شي چې څنګه کولی شي له دې ناروغۍ ځان وساتي.»
د مزار شريف اوسېدونکی نقیب الله وايي: « خلک باید دا ناروغي جدي وګړي او د عامې روغتیا ریاست له سپارښتنو پیروي وکړي. دا کمپاین د خلکو په خبرولو کې ډېر رول لري.»
په ورته مهال، د بلخ عامې روغتیا ریاست مسوولین وايي، تېر کال په دې ولایت کې شاوخو ۱۸۰ کسان په کانګو ناروغۍ اخته شوي وو چې له ډلې یې شاوخوا ۳۰ کسانو ژوند له لاسه ورکړ.
د بلخ عامې روغتیا ریاست ویاند کمال خان ځدراڼ وايي: « د بلخ ولایت عامې روغتیا ریاست د کانګو ناروغۍ د مخنیوي کمپاین ترسره کړ. دا کمپاین په مزار شریف ښار او ولسوالیو کې ترسره کېږي او په کې هغو کسانو ته د مخنیوي لارې وښودل شي چې څاروي حلالوي. موږ تېر کال له همدې ناورغۍ څخه ۱۸۰ تنه بستر درلودل. سږ کال هم د کال په تېرو څلور میاشتو کې ۳۴ تنه له موږ سره بستر شوي چې له ډلې یې ۵ تنو ژوند له لاسه وکړی.»
ډاکټران وایي، کانګو هغه ویروسي ناروغي ده چې معمولاً له تبې، د بدن له شدید درد، ستړیا او وینې بهېدنې سره پیلېږي، که پر وخت یې درملنه ونه شي، د ناروغ ژوند له جدي ګواښ سره مخ کولی شي.
دوی له خلکو غواړي، هر څوک چې د دغې ناروغۍ نښې احساس کړي، باید بې له ځنډه روغتیايي مرکزونو ته مراجعه وکړي، ترڅو پر وخت درملنه او د ناروغۍ د خپرېدو مخه ونیول شي.
