عامی روغتیا وزارت وايي، په پام کې ده چې د ماشومانو د ګوزڼ(پولیو) په ضد په دې دویم فرعي ملي کمپاین کې ۸.۳ میلیونه له پنځو کالو کوچني ماشومان واکسین شي.
د پولیو ضد دا دویم فرعي ملي کمپاین د دوشنبې په ورځ پیل او تر درېیو ورځو به دوام ولري چې په ترڅ کې به یې د هېواد په مرکز، ختیځ، سوېل، لوېدیځ، سوېل ختیځ، شمال او شمال ختیځو حوزو کې د شلو ولایتونو په ۱۹۴ ولسوالیو کې پلی شي.
د عامې روغتیا وزارت د خبرپاڼې له مخې، د عامی روغتیا وزیر مولوي نور جلال جلالي د دې کمپاین د پیل په مراسمو کې ویلي چې د عامې روغتیا وزارت او نړیوال شریکان یې ژمن دي چې افغانستان له پولیو څخه پاک کړي.
جلالي له دې وړاندې دیني عالمانو، قومي مخورو او د ټولنې له ټولو وګړو غوښتي چې د دې کمپاین په پلي کولو کې همکاري وکړي.
د عامې روغتیا وزیر دغه راز ویلي: « موږ هڅه کوو چې د پولیو واکسین د کمپاینونو ترڅنګ، د نورو بشپړوونکو روغتیايي خدماتو په دوام سره په ټول هېواد کې د پولیو ناروغۍ له منځه وړلو موخې ته ورسیږو. اړینه ده چې دیني علما، قومي مخور، والدین او د ټولنې نور بانفوذه وګړي په ټول هېواد کې د واکسیناتورانو ملاتړ وکړي. موږ له ټولو څخه غوښتنه کوو چې له دې ناروغۍ سره په مبارزه کې خپل مسوولیت ترسره کړي او د خپلو ماشومانو روغتیا او خوندیتوب ته پاملرنه وکړي.»
د عامې روغتیا وزارت په خبرپاڼه کې دا هم ویل شوي چې په کندهار، هلمند، اورزګان او زابل ولایتونو کې به د پولیو په وړاندې د واکسین دا کمپاین یوه ورځ په ځنډ، یانې د مې میاشتې په ۱۹ نېټه پیل او تر ۲۲ نیټې به دوام وکړي.
که څه هم په افغانستان کې د روان ۲۰۲۶ میلادي کال په اوږدو کې د پولیو کومه نوې پېښه نه ده ثبت شوې، خو په تېر ۲۰۲۵ میلادي کال کې د پولیو د لومړۍ بڼې ټولې دوه پنځوس پېښې ثبت شوې وې چې په کې ۲۱ یې په افغانستان کې او ۳۱ پېښې له پاکستان څخه رالیږدول شوې وې.
د ورکړل شویو معلوماتو له مخې، د پولیو دا پېښې د هېواد په هغو سوېل او ختیځ سیمو کې راجسټر شوې دي چې د واکسین کمپاین په کې نه دی پلی شوی.
د عامې روغتیا وزارت په خپله خبرپاڼه کې له ټولو خلکو غوښتي چې ځانونه د واکسین کمپاین د ټیمونو له موقعیتونو خبر کړي او له پنځو کلونو څخه کم عمره ماشومان واکسین کړي.
د عامې روغتیا وزارت په خبرپاڼه کې راغلي: « د واکسین ټیمونه به د کمپاین په جریان کې ستاسو د سیمې په ټاکل شویو ځایونو کې شتون ولري. له والدینو او پالونکو څخه غوښتنه کوو چې له دغو ځایونو څخه ځان خبر کړي او خپل ټول له پنځو کلونو کم عمره ماشومان د واکسین لپاره ور ولي.»
پولیو یوه ویروسي ناروغي ده چې هېڅ درملنه نه لري او مخنیوی یې یوازې د واکسین له لارې شونی دی. پولیو ویروس د ماشومانو د دایمي فلج او یا هم مرګ سبب کېدای شي.
د عامې روغتیا وزارت هم په هېواد کې د پولیو پېښو موجودیت تایید کړی، خو دا یې نه دي ویلي چې څومره شېمر پېښې موجودی دي.
عامې روغتیا وزارت وړاندې د پولیو پر وړاندې د مبارزې ټټر وهلی او وايي، له افغانستان څخه د دې ناروغۍ د لمنې ټولولو ته ژمن دی.
