هانټا ویروس(د موږکانو ویروس) په ١٩٥٠ زېږدیز کال د لومړي ځل لپاره په کوریا کې تشخيص شو، خو د یوې کروز مسافر لېږدونکې بېړۍ په سپرلیو کې یې د مثبتو پېښو پيدا کېدل، يوځل بیا د نړیوالو اندېښنو سبب شول.
د اېچ وي هانډروز په نوم یاده بېړۍ چې له ارجنټاین څخه کیپ وېرډ ټاپو ته پر لاره وه، سلګونه مسافر یې د کیف وېرډ پلازمینې پرایا ته له رسېدو سره سم، روغتونو ته لېږدول شوي.
د روغتیا نړیوال سازمان ویلي، په بېړي کې د ویروس مثبتو پېښو له امله درې کسان مړه شوي او شاوخوا ٧ تنه شکمن تر جدي مراقبت لاندې روغتیایي مرکزونو کې قرنټين دي.
د چارواکو په خبره، د هانټا ویروس د کویډ نولس(کرونا ویروس) په څېر د انسانانو ترمنځ په چټکۍ نه خپرېږي، خو په خبره يې، پرې له اخته کېدو وروسته د مړينې خطر ډېر لوړ وي.
د روغتیا نړیوال سازمان رییس تېدروس ادهانوم ویلي: « کله چې له مختلفو اړخونو ورته وګورو، نو یوه جدي اندېښنه نه ده؛ خو په ورته مهال، بشپړ چمتوالی موږ ته ډاډ راکوي او د ویروس پر څرنګوالي مو پوهوي. موږ ډېر ځله دا ویلي چې هغه د کویډ نولس بڼه نه لري، خو پر وړاندې یې بې باکي دا مانا لري چې موږ خپل خوندیتوب پرېږدو؛ موږ باید لاس په کار شو.»
د روغتیا نړیوال سازمان د معلوماتو له مخې، هانټا ویروس د موږکانو له غايطه موادو، خولې لعاب، ادرار او هغه ککړ چاپېریال څخه پیداکېږي چې دا ټول په کې موجود وي.
د دې سازمان موندنې ښيي، هانټا ویروس د انسانانو تر منځ په چټکۍ نه خپرېږي، خو په استثنایي برخو کې د خپرېدو لامل یې پرې له اخته شوي کس سره د اوږدې مودې لپاره نږدې پاتې کېدل دي.
ډاکټران یې لومړنۍ نښې، زکام، سردردي، نس ناستی، ستړیا، د عضلاتو دردونه او تنفسي ستونزې بولي او دغه راز له جدیت وروسته یې ساه لنډی، ټوخی، په پښتورګو کې د مایعاتو ټولېدل، د وینې لوړ فشار، کمزوري او د زړه ضربان زياتېدل یادوي.
د بریټانیا په ویرل پوهنتون کې د تعلیمي روغتون اجراییوي ریيسه جېنل هالمېس وايي: « دا یو پېژندل شوی ویروس دی او په بشپړه توګه د کنټرول وړ دی. خطر یې ډېر کم دی او د کویډ نولس په څېر چټک نه خپرېږي.»
د بریټانیا بهرنیو چارو وزارت ویلي، په بهر کې پر هانټا ویروس اخته بریټانويان یې خپل هېواد ته لېږدولي او د لېورپول په ارو پارک روغتون کې يې قرنټين کړي دي.
د راپورونو له مخې، د هانټا ويروس له امله په مړو شویو درېیو کسانو کې دوه یې د هالنډ او درېیم هغه یې د جرمني وګړی دی.
