په دې درې ورځني نندارتون کې چې موخه یې له ښځو څخه ملاتړ او د دوی لاسي صنایعو او هنري اثارو ته بازار موندنه ښودل شوې، د ښځو لاسي صنایع، انځورګرۍ، حکاکي او مینیاتوري اثار نندارې ته اېښودل شوي دي.
ځایي چارواکي وايي، دا نندارتون په هرات کې د ایران کونسلګرۍ له خوا پرانستل شوی او ډاډ ورکوي چې د افغانستان ښځو لاسي صنایع او هنري اثار به تر نړیوالو بازارونو ورسوي.
هرات کې د ایران کونسلګرۍ مرستیال سید علي کامیاب وايي: « په دې نندارتون کې ډېر ښایسته او په زړه پورې اثار وړاندې شوي او د دې وړتیا لري چې هم د افغانستان نورو ولایتونو ته پراخ شي او هم د سیمې هېوادونو ته وړاندې شي.»
د نندارتون جوړولو مسووله سوسن کاظمي وايي: « دا زموږ د نندارتون ۴مه دوره ده چې په کې د افغانستان د ښځو لاسي صنایع د درېیو ورځو لپاره نندارې ته اېښودل کېږي. د دې نندارتون موخه دا ده چې موږ د ښځو په لاس جوړو شویو توکو هنر نندارې ته وړاندې کړو، نړۍ ته یې معرفي کړو او ژوندی یې وساتو.»
نندارتون کې برخه اخستونکې ښځې دا ډول نندارتونونه خپلو لاسي صنایعو او هنري اثارو ته د بازارموندنې لپاره مهم بولي او ټینګار کوي چې که ملاتړ یې وشي، کولی شي د هنر له لارې د هرات بډایه فرهنګي میراثونه بیا را ژوندي کړي.
د خټین زر ګالرۍ مسووله نګیتا درانۍ وايي: « څومره چې د ښځو لپاره زمینې پراخې شې، هغومره ښځې کولی شي پرمختګ وکړي او خپل هنر تر نورو خلکو ورسوي. دا ډول نندارتونونه زموږ ښځمنو لپاره ډېره ګته لري؛ ځکه موږ کولی شو هغه فرهنګي میراثونه بېرته ژوندي کړو چې له نورو راپاتې دي او اوس له خلکو هېر دي.»
هنرواله قریش ملک زاده وايي: « موږ د همداسې نندارتونونو له لارې وده کوو، پېرودونکي جذبوو، بازار موندنه کوو او له لارې یې عاید ترلاسه کوو.»
بله خوا، د فرهنګي چارو کارپوهان د هنرمندانو ملاتړ لپاره د دا ډول نندارتونونو پر زیاتوالي ټینګار کوي او وایي، که هنرمندانو ته دوامداره ملاتړ برابر شي، کولی شي د هېواد د فرهنګي ارزښتونو په ساتنه او اقتصادي ودې کې مهم رول ولوبوي.
د فرهنګي چارو کارپوه ولي شاه بهر وايي: « د هنرمند ستاینه او هڅول کولی شي د هنر پر غوړېدنه ځانګړی اغېز ولري. هڅول د هنرمندانو مسلم حق دی او کله چې د دوی ستاینه کېږي او اثار یې پېرل کېږي، دوی خپل کار ته تشویق کېږي او د خپل هنر د ګټې مزه څکي.»
دا په داسي حال کې ده چې په دې وروستیو کې په هرات ولایت کې د لاسي صنایعو او هنري اثارو برخه د ودې په حال کې ده او ګڼ شمېر ښځې هڅه کوي د خپل هنر له لارې اقتصادي ځان بسیاینې ته ورسېږي.
