د هرات عامې روغتیا ریاست مسوولین د روغتیايي خدمتونو د پراختیا مثبتو اغېزو ته په کتو وايي، دا مهال په دې ولایت کې دولتي او خصوصي روغتیايي مرکزونه د درملنې په برخه کې پرمختللي خدمات وړاندې کوي.
د دوی په خبره، اوسمهال په دې ولایت کې ټولو شته دولتي او خصوصي روغتونونو کې پرانستي او تړلي عملیات ترسره کېږي.
د هرات عامې روغتیا ریاست د روغتوني خدمتونو د تنظیم آمر محمد داود رحماني وايي: « په دې وروستیو کې د ټول افغانستان او په ځانګړې توګه د هرات ولایت په کچه د روغتیايي خدمتونو په تړاو مثبت بدلونونه رامنځته شوي. د خدای شکر دی مو ږ په وروستیو کالو کې موږ خورا زیات فوق التخصصي جراحي عملیات د هرات په حوزوي روغتون او نورو روغتونونو کې درلودې او دا ډېر د ویاړ ځای دی.»
ډاکتران وایي، دا مهال د هرات په دولتي او خصوصي روغتونونو کې د زړه پرانستي جراحۍ عملیاتو، تړلو لیزري عملیاتو، د اورتوپیدي او هضمي سیسټم تړلو جراحي عملیاتو او نور وعملیاتونو ترسره کولو لپاره پوره امکانات شته دي.
د دوی په وینا، هرات کې وړاندې کېدونکي پرمختللي روغتیايي خدمات د دې سبب شوي چې خلک د درملنې په موخه بهرنیو هېوادونو ته تګ کم کړي.
د اورتوپیدي او ټراماتولوژي متخصص بشیر احمد احمدي وايي: « الحمدالله موږ په هرات کې د زړه جراحۍ پرانستي عملیات لرو، همدارنګه تړلي یا لایزري عملیات لرو او په دې برخه کې ګڼ شمېر متخصصان لرو. همدارنګه د هضمي جهار په برخه کې هم خورا پیاوړي کارونه ترسره کېږي او په دې برخه کې فوق التخصص ډاکټران لرو. باید یادونه وکړم چې د عصبي جراحۍ عملیاتو په اړه د مثال په توګه د سر کوپړۍ کې دننه کار کوو، لوی لوی تومورونه لرې کوو او ښه فوق العاده کار کولی شو.»
په ورته مهال، یو شمېر ناروغان هرات کې د روغتیایي خدمتونو څخه راضي دي او وايي، په افغانستان کې د پرمختللیو جراحي عملیاتو ترسره کېدل هغوی په ګاونډیو هېوادونو کې د درملنې له لوړو لګښتونو بېنیازه کړي دي.
ناروغ حمیدالله وايي: « زه له زنده جان ولسوالۍ څخه راغلی یم او د پښې ګونډه مې مشکل لري. زه له ډاکټرانو ډېر خوښ یم او دا هم د شکر ځای دی چې بهرنیو هېوادونو ته اړ نه یم. که خدای کول زما عملیات همدلته کېږي.»
ناروغ عزیز احمد وايي: « ډېر خوښ یم چې د خپلو ډاکټر صاحبانو تر درملنې لاندې یم، لګښتونه کم دي او هغه کم لګښتونه هم زموږ د خپلو خلکو جېب ته ځي.»
تر دې مخکې اکثریت افغانان چې د زړه، اورتپیدي او معدې د ناروغیو درملنې لپاره تر ډېره هند، پاکستان او یا هم ایران ته تلل، ځکه چې دوی په هېواد کې دننه له وړاندې کېدونکو خدماتو ډاډمن نه وو.
د دوی په خبره، اوس د معیاري درملنې امکاناتو په برابرېدو سره ډېری خلک دا غوره ګڼي چې په هېواد کې دننه درملنه وکړي.
