د عامې روغتیا وزیر چې اوسمهال هند ته په یوه رسمي سفر بوخت دی، د دودیزې درملنې یا سنتي طب د نړیوال کنفرانس د سرمشریزې په څنډه کې د نړۍ د ۲۳ هېوادونو له روغتیا وزیرانو سره جلا جلا ناستې کړې.
د عامې روغتیا وزارت ویاند ډاکټر شرافت زمان د دغو ناستو موخه د تجربو تبادله، د دودیزې درملنې وده او د همکاریو پراختیا بللې.
د عامې روغتیا وزارت ویاند ډاکټر شرافت زمان وايي: « د دې ناستې موخه چې د ګډو تجربو تبادله، د دودیزې درملنې برخې پياوړي کول، د همکاريو پراختيا او د هېوادونو تر منځ روغتيا برخه کې د دومداره همغږۍ رامنځته کول وو. د عامې روغتيا وزير مولوي نور جلال جلالي په خپله وینا کې د دودیزو درملو اهمیت او د عامې روغتیا په پرمختګ کې د دې درملنې ارزښت بیان او ويې ويل، په معيار برابره دودیزه درملنه د روغتیايي خدمتونو پراخوالی تضمینوي او په روغتيايي سکټور د خلکو باور هم زیاتوي.»
د عامې روغتیا وزارت د مسوولینو په خبره، دا نړیوال کنفرانس د ۲۰۲۵ تر ۲۰۳۵ کلنو ترمنځ د دودیزي درملنې نړیوالې سټراټیژۍ پیاوړتیا او پلي کېدو لپاره جوړ شوی و او افغانستان هم د دغې سټراټیژۍ ملاتړ کړی.
د عامې روغتیا وزارت ویاند په دې اړه وايي: « دا دوهم نړیوال کنفرانس د روغتیا نړیوال سازمان د دودیزې درملنې د نړیوالې ستراتیژۍ(۲۰۲۵–۲۰۳۴) کلونو پورې د پلي کېدو د پیاوړتیا لپاره جوړ شوی؛ هغه ستراتیژي چې د شواهدو پر بنسټ د دودیزې او تکمیلي درملنې پیاوړتیا، د دودیزې درملنې خوندي او اغېزمنې کارونې لپاره د یو منظم چوکاټ رامنځته کول، له روغتیايي سیسټمونو سره معقول ادغام او د ټولنو پیاوړتیا اساسي محورونه ګڼي. دغه راز، ښاغلي وزير ټینګار وکړ چې افغانستان په رسمي ډول د یادې سټراټیژۍ ملاتړ کوي او ژمن دی چې د خپلې دوديزې درملنې ملي تګلارې، نصابونه او مقررات له نړیوالو معیارونو سره همغږي کړي.»
د یادونې وړ ده چې په یاده ناسته کې د هند هېواد د درملو پراختیایي ادارې له لوري افغانستان سره د موسمي ناروغیو درملنې په موخه د شاوخوا سل زره ډوزه واکسین مرسته هم وشوه.
