د عامې روغتیا وزير ننګرهار کې د سرطاني ناروغیو د درملنې۵۰ بستریز روغتون پرانېسته وکړه. مولوي نور جلال جلالي وايي، د دې روغتون له جوړېدو موخه دا ده چې پر سرطاني ناروغیو اخته ناروغانو درملنه په هېواد کې دننه وشي او بهر ته د تګ له احتیاجه خلاص شي.
د عامې روغتیا وزیر وايي: « موږ د کنسر یا سرطاني ناروغیو د درملنې لپاره معیاري روغتون نه درلوده. اوس دا دی پنځوس بستریز روغتون پرانیستل شو؛ له دې سره په آیسييو برخه کې چې ډېره مهمه ده، ټول لس بستره موږ درلودل چې اوس شلو بسترونو ته پورته شول.»
د ننګرهار ځايي چارواکي وايي، پر حوزوي روغتون باندې د ناروغانو ګڼه ګوڼه زیاته ده او امکانات کم دي چې د دوی په خبره، باید مجهز طبي وسایل ورته برابر شي.
د چارواکو په وینا، د درملو داخلي فابریکو ملاتړ ترڅنګ باید د پاکستان پرځای له نورو هېوادونو سره د درملو واردولو برخه کې قراردادونه وشي.
ډاکټر نجیبالله انورزی وايي: « موږ د څو محدودو طبي آلاتو په درلودلو سره د سرطاني ناروغیو مقابله کوو؛ دا په هېڅ صورت کافي نه ده بلکې د طبابت په برخه کې عصري ټکنالوژۍ ته اړتیا ده. موږ وسایل غواړو، زه د ټولو ډاکټرانو او زون په استازیتوب خبرې کوم او له حکومت غواړم چې موږ ته عصري وسایل چمتو کړي.»
د ننګرهار مرستیال والي عزیز الله مصطفی وايي: « موږ د درملو په برخه کې هم ستونزې لرو او دا حالت ټولو ته څرګند دی. زموږ وړاندیز دا دی چې که نړیوال شرکتونه د درملو او وسایلو لپاره دلته را دعوت شي او د پانګونې زمینه ورته برابره شي، همدارنګه په ملي سوداګرو هم غږ وشي چې د روغتیا په برخه کې پانګونه وکړي، ترڅو موږ له احتیاج خلاص شوو.»
همدارنګه، د عامې روغتیا وزير وايي حکومت ژمن دی چې د درملو داخلي فابریکو له تولیداتو څخه په روغتونونو کې ګټه واخلي او دغه راز درملو ته د شته اړتیا پوره کولو لپاره له روسیې او ایران سره نوي قراردادونه وکړي.
د عامې روغتیا وزیر نور جلال جلالي وايي: « زموږ هڅه دا ده چې خپل تولیدات پر پښو ودروو او له هغوی څخه خریداري وکړو. د اوس لپاره ښايي زموږ ملګري ایران او روسیې ته هم سفرونه وکړي. په روسیه کې یوه کمپنۍ چې ډېره معیاري ده، ۸۰۰ قلمه تولیدات لري. که خدای کول له دې کمپنۍ سره به د غوره او ارزانه درملو یو تړون لاسلیک شي.»
د عامې روغتيا وزارت چارواکو د معلوماتو له مخې، افغانستان دا مهال پر پاکستان سربېره له بنګله دېش، ترکیې، ایران، هند او ازبېکستان سره هم د درملو د واردېدولو قراردادونه لري.
