Skip to content
د کندهار روغتيا رياست مسوولين وایي، دغه ولایت له تېرو څلورو اونيو راهيسي د پخوا پرتله د کورونا وبا مثتبې پېښې ۲۰ سلنه زياته شوي، خو پر وینا یې د کورونا د نوي بڼې امېکرون مثبتي پېښي تر اوسه نه دي ثبت شوي.
سويلي حوزه کي د کورونا د بېړني مرکز مشر ډاګټر محمد سرور فېروزي وايي:«له لومړي سره د کورونا پېښې په ټپه نه دې درېدلي،داسې ورځ دې نه وي،چې موږ دې مثبتې پېښې نه وي ثبت کړي،خو له تېرو څلورو اوونیو راهیسې مثبتې پېښې زیاتې شوي. هره ورځ له لسو تر ۱۵ پورې موږ مثبتې پېښې ثبت کوو.»
د کندهار ښار اوسېدونکي بيا له روغتيایي مسولينوغواړي،چې د کورونا د نوې بڼې امېکرون له امله د پېښېدونکو روغتيایي ګواښونو د مخنیوي لپاره سر له اوسه چمتوالی ونیسي، ځکه په تېر کې کورونا له زياتو کسانو ژوند اخېستی.
د کندهار ښار اوسېدونکی سید ابراهیم شاه وايي:« خلک باید د کورونا وبا پر وړاندې جديت په پام کې ونیسي.د ډاکترانو ټولې سپارښتنې باید عملي کړي. د لاسونو وینځل، ماسک کارونه او فاصلې باید مراعت کړي.»
په سويلي حوزه کې د کورونا د بېړني مرکز مشر ډاګټر محمد سرور فېروزي وایي، تر اوسه په کندهار کې د کورونا د نوې بڼي امېکرون پېښي نه دي ثبت شوي، خو پر وینا یې دوی د کورونا د ناروغانو د درملني لپاره پوره چمتوالی او امکانات لري.
فېروزي زیاتوي:« د اوس لپاره ټول امکانات، وسایل او درمل په پوره اندازه موجود دي، خو که پېښې تر دې زیاتې شي، یا حالت بېړنی کېږي، نو بیا به هغه وخت د امکاناتو په اړه مالومات کېږي.»
د مالوماتو له مخې، په کندهار کې تر دې اوسه پورې د کورونا ۸۴۸۸ مثبتي پېښي ثبت شوي، چې له ډلي يې ۲۴۳ تنو خپل ژوند له لاسه ورکړی او ۸۲۹۵ تنه بېرته له دغې ناروغۍ رغېدلي دي.
