د کندهار میرویس حوزوي روغتون کې د داخله ناروغیو څانګه، د ګڼو تنفسي او زړه اړوند ناروغانو کوربه ده.
دلته هره ورځ سلګونه ناروغان له لرې پرتو سیمو او آن له ګاونډیو ولایتونو مراجعه کوي.
د روغتون مسوولین وایي، د زړه او تنفسي ناروغیو کچه د پخوا په پرتله لوړه شوې.
د دوی په وینا، یوازې په تېرو درېیو میاشتو کې ۳۷۲ تنه د زړه ناروغان په دې روغتون کې د بېلابېلو جراحي عملیاتو او نورې درملنې لپاره راغلي دي.
د میرویس حوزوي روغتون د داخله څانګې مسوول عزتالله نېکزاد وايي: « تنفسي ناروغیو له پله په درېیو میاشتو لکه سرطان، اسد او سنبلې کې موږ ۱۹۹ تنه ناروغان لرل. همدارنګه د سږ کال په همدې درېیو میاشتو کې مو ۱۷۹ تنه د زړه ناروغان بستر کړي دي. زموږ د معلوماتو له مخې، د دغو ناروغانو کچه کال په کال زیاتېږي.»
ډاکتران وایي، د هوا ککړتیا، ناسالم خواړه او د عامه پوهاوي کموالی هغه اصلي عوامل دي چې د زړه او تنفسي ناروغیو د زیاتوالي لامل ګرځي.
دوی ټینګار کوي چې باید د عامه پوهاوي پروګرامونه او د ناروغیو د مخنیوي هڅې پیاوړې شي.
میرویس حوزوي روغتون کې د زړه او تنفسي ناروغیو متخصص شفیعالله شمس وايي: « زموږ ځوانان فزیکي فعالیت نه کوي، داسې خواړه خوري چې په غوړو کې سره شوي وي او همدا د دې لامل کېږي چې په دوی کې د زړه ناورغۍ ډېرې شي. همدارنګه د تنفسي ناروغیو په اړه ځوانان دوخانیات کاروي، د سیګرېټو او چلم څکول سبب کېږي چې تنفسي ناروغۍ ډېرې شي.»
بله خوا، یو شمېر ناروغان چې له لرې پرتو سیمو د درملنې لپاره راغلي وایي، د خصوصي روغتونونو د درملنې توان نه لري او له مسوولینو غواړي چې په دې برخه کې روغتیایي خدمات زیات کړي.
د زړه ناروغ توریالی وايي: « څلور پنځه ورځې وړاندې مې د سیمې په قفس کې درد احساس کړ. روغتون ته راغلم او له معایناتو وروسته ښکاره شوه چې د زړه حمله راباندې راغلې او یو رګ مې بند دی.»
د زړه ناروغ فضل محمد وايي: « ما د ساه لنډي ناروغۍ درلوده، دلته راغلم او درملنه مې پيل کړه. اوس څه نا څه ښه شوی یم. زه له چارواکو غوښتنه کوم چې خدمات نور هم زیات او معیاري کړي.»
د یوه بستر ناروغ مل او پایواز وايي: « ما له هلمند ولایت څخه ناروغ راوستی، اوس یې وضعیت ښه دی. له چارواکو غوښتنه لرم چې خدمات نور هم زیات کړي.»
د زړه او تنفسي ناروغیو له ډېروالي داسې مهال اندېښنې شریکېږي چې کندهار کې ورځ تر بلې وچکالي او د هوا ککړتیا مخ پر ډېرېدو ده.
