د بلخ حوزوي روغتون کې د بېړنیو ناروغانو د درملنې څانګه د عامې روغتیا وزارت په همکارۍ او د ملګرو ملتونو په مالي لګښت ګټه اخیستنې ته وسپارل شوه.
مسوولین وایي، دا څانګه پرعصري او طبي وسایلو سربېره د ۱۵ تنو ناروغانو لپاره د بستر ظرفیت هم لري.
د بلخ عامې روغتیا ریاست ویاند کمال خان ځدراڼ وايي: « نن ورځ د آی سي یو یا بېړنۍ درملنې څانګه پرانستل شوه. پر دې څانګه شاوخوا ۱.۶ میلیون ډالره لګښت راغلی چې د عامې روغتیا وزارت او ملګرو ملتونو پراختیايي ادارې(یواېنډيپي) له خوا ورکړل شوی. دا څانګه ۱۵ خونې لري او په پرمختللیو طبي وسایلو سمبال ده.»
د بلخ حوزوي روغتون ای سي یو څانګې آمر احمد سمیر نیازی وايي: « له نېکه مرغه د بېړنیو خدمتونو څانګې په پرانیستلو سره به ناروغانو ته ډېرې اسانتیاوې برابرې شي. دغه څانګه په عصري وسایلو سمبال ده او د هغو ناروغانو درملنه به په کې کېږي چې پخوا یې دلته امکانات نه وو.»
په ورته مهال، ناروغ لرونکي بیا د دې څانګې پرانستنه مهمه بولي او وايي، پخوا په دې برخه کې له زیاتو ستونزو سره مخامخ وو.
څانګه کې د یوه بستر ناروغ پایواز وايي:« دا یو ډېر ښه او نېګ ګام دی او له ناروغانو سره به ډېره مرسته وکړي. دا ځای ډېر پراخ دی او ورسره به ناروغان له ډېرو ستونزو وژغورل شي. موږ د دې څانګې له خدماتو راضي یو.»
د یوه بل ناروغ پایواز وايي: « هر ناروغ او د هغه پایواز ته دا مهمه ده چې جدي مراقبت یې وشي. دا هغه څانګه ده چې د ناروغانو ښه مراقبت به کوي. د دوی خدمات ډېر مؤثر دي.»
په ورته مهال، مسوولین ډاډ ورکوي چې روغتیايي برخه کې د لا ډېرو اسانتیاوو برابرولو هڅه کوي.
د بلخ عامې روغتیا ریاست مرستیال سید احمد شاداب وايي: « موږ کوښښ کوو چې د ولس لپاره په هره برخه کې، که دا روغتیايي وي که نورې، اسانتیاوې برابرې کړو.»
د بلخ مرستیال والي نورالهادي ابو ادریس وايي: « په دې څانګه کې به د ناروغانو هر ډول اړتیاوې پوره شي. د اسلامي امارت ټولې ادارې یې ملاتړ کوي.»
د یادونې وړ ده چې د بلخ حوزوي روغتون د شمال زون په کچه د ۸۵۰ بسترونو په لرلو سره خلکو ته په بېلابېلو برخو کې خدمات وړاندې کوي.
