د اکتوبر ۲۴ مه؛ د پولیو (ګوزڼ) نړیواله ورځ ده.
د دې ورځې په مناسبت له ګوزڼ پاک افغانستان بنسټ له یادې ناروغۍ د ژغورنې په موخه له پنځوکلونو کم عمره ماشومانو ته د ګوزڼ ضد واکسین پر تطبیقولو ټینګار کړی.
دغه بنسټ زیاته کړې:« هر ماشوم حق لري چې روغ لوی شي او د پولیو ناروغۍ ښکار نه شي. راځئ! خپلې ژمنې تازه کړو او د خپلو ماشومانو لپاره له پولیو پاک راتلونکی تضمین کړو.»
بل خوا د ملګرو ملتونو د ماشومانو ملاتړ صندوق (يونېسف) هم د دې ناروغۍ مخنيوي لپاره پر ګډو هڅو ټېنکار کړی او په دغه برخه کې يې د مالي ملاتړ کوونکو او واکسیناتورانو هڅې ستايلې دي.
يونېسف زیاته کړې:« د پوليو نړیوالې ورځې په مناست راځئ چې د پولیو پر وړاندې یوځای ودریږو او ډاډ ترلاسه کړو چې هر ماشوم واکسین ترلاسه کړي. موږ د ټولو بسپنه ورکوونکو او په افغانستان کې د زړورو واکسیناتورانو له هڅو مننه کوو.»
روغتیا پالان وایې، پولیو یوه وېروسي او جنټیکي ساري ناروغي ده، چې د مخنیوي وړ ده.
د دوی په باور په افغانستان کې دعامه پوهاوي د نه شتون له امله خلک د پولیو پر واکسین بې باوره شوې دي.
رورغتیاپال عبدالرازق احمدزی وايي:« په لرې پرتو سیمو کې قوي کمپاینونه او خلکو ته عامه پوهای ترسره شي. بل دا ده چې ښځينه کارکوونکې په دې برخه کې وګومارل شي، ترڅو په لرې پرتو سیمو کې کورنیو ته دوی دا پوهاوی ورکړي چې هغوی په دې برخه کې سم مالومات ترلاسه کړي. په هېواد کې د غلطو عقیدو شتون دی.»
د اکتوبر ۲۴مه د پولیو نړیواله ورځ د نړۍ په بېلابېلو هېوادونو کې د عامه پوهاوي، او د پولیو سره د مبارزې په موخه نمانځل کېږي.
روان ۲۰۲۵ کال عامې روغتيا وزارت په رسمي ډول پر پوليو اخته ماشومانو د شمېر په اړه څه نه دې ويلي.
