خیرګل د ننګرهار دره نور ولسوالۍ اوسېدونکي دی. نږدې میاشت وړاندې یې په ختیځ کې د شوې زلزلې له امله کور ویجاړ شوی او اوس په خېمه کې ژوند تېروي.
دی وايي، تر زلزلې وروسته يې ماشومانو ته بېلا بېلې ناروغۍ پيدا شوې دي. د ده په خبره، ماشومان یې د نورو ناروغیو په پرتله له نس ناستي او د سترګو له ناروغیو ډېر ځوريږي.
د دره نور ولسوالۍ دغه اوسېدونکی وايي: « زما ماشومانو ته د ستوګو ناروغۍ، اسهال او د نم له امله نورې ناروغۍ پیدا شوې دي؛ ځکه موږ دلته په پټیو کې خېمې درولې دي. موږ غوښتنه کوو چې دلته روغتیايي ټیمونه راشي او اړین خدمات وړاندې کړي.»
خیرګل د خپرو شویو ناروغیو په تړاو دغه راز وايي، په دوامداره توګه خېمو کې ژوند کولو له امله د روماټېزم په څېر نورو ناروغیو د پيدا کېدو وېره هم شته. دی له مسوولو ادارو او مرستندویه بنسټونو د دایمي سرپناه جوړولو غوښتنه کوي.
خیرګل په دې اړه وايي: « موږ غوښتنه کوو چې د ژمي له راتګ څخه وړاندې زموږ د کورونو بندوبست وشي او راته جوړ شي؛ ځکه دلته له میزان میاشتې وروسته هوا سړېږي، بارانونه او واورې اورېدل پيل کېږي.»
په همدې حال کې د دره نور ولسوالۍ روغتیايي مسوولین هم په دې سیمه کې د تازه ناروغیو خپرېدل تاییدوي خو وايي، اوسمهال د دغو ناروغیو د مخنیوي او د زلزله ځپلو لپاره د روغتیايي خدمتونو وړاندې کولو په موخه ثابت او ګرځنده روغتیايي کلینیکونه فعالیت کوي.
د دره نور ولسوالۍ د روغتیا مسول ډاکټر رفیع الله حماد وايي: « دلته اوسمهال د بېلابېلو موسسو ګرځنده ټیمونه شته دي، فعال دي او په ساحه کې کار کوي. دوی ته ساحې وېشل شوې دي او هره ورځ خپلو ساحو ته ورځي. همدارنګه له وزارت څخه هم ټیمونه راغلي او ریاست ته یې ډاډ ورکړی چې د ثابتو روغتیايي کلینیکونو او ګرځنده ټیمونو شمېر به زیات کړي، ترڅو خلکو ته اړین خدمتونه ورسېږي.»
دا یوازې خیرګل نه دی چې تر زلزلې وروسته یې د کورنۍ غړي په ناروغیو اخته شوي بلکې د دره نور ولسوالۍ په ګډون د کونړ زلزله ځپلې کورنۍ هم له مسوولو ادارو او مرستندویه بنسټونو د دایمي سرپناه سربېره، په روغتیايې برخه کې د عاجلو خدمتونو غوښتنه کوي.
