Skip to content
د کورونا وبا مخنیوي لپاره دوا جوړونکی افغان حکیم محمد الکوزی وایي، په ټوله نړۍ او په ځانګړې توګه افغانستان کې د کورونا څپه د زیاتېدو په حال کې ده او غواړي په دې برخه کې خپل مسوولیت اداء کړي.
الکوزی وایي، تیرځل یې تر ۱۴ میلیونه کسانو دارو ورسول او هېڅ یوه کس ته یې زیان نه دی پېښ کړی، بلکې ډېری خلک ورسره ښه شوي دي.
الکوزی وایي، دوا کې یې ۱۱ ډوله طبيعي بوټي ګډ کړي او هېڅ یو یې د چا پر زیان نه ده.
هغه وایي، دې برخه کې د روغتیا نړیوال سازمان، ډاکتران او لابراتوارونه فرصت لري،چې پلټنې وکړي او که غلطه یې ثابته کړي،حاضر دی چې هر نوع مسوولیت یې ومني.
الکوزي زیاته کړه:« زما دوا د هرې ناروغۍ لپاره کفایت کوي، نو اومیکرون لا څه شی دی، اوس نړۍ ته چلنج ورکوم،چې را دې شي او زما له دارو دې د رسنیو په مخکې ګټه پورته کړي. موږ دې چلینج کړي،چې الکوزی رېښتیا وایي او که دروغ؟
نړۍ دې راشي او له ما دې وپوښتي،چې د ټولو مخکې زر کسانو ته دوا ورکوم،که پنځه یې هم جوړ نه شول،زه ملامت.»
الکوزی وایي، دوا یې د کورونا وبا نوې بڼې اومیکرون لپاره هم اغیزناکه ده او په وینا یې خپله اومیکرون بڼه ډیره ګواښونکې نه ده.
حکیم د تېر حکومت د عامې روغتیا وزارت له مسوولینو ګیله کوي،چې د ده نوم یې بد کړی و او له اسلامي امارت غواړي،چې ملاتړ یي وکړي.
الکوزي زیاته کړه:« یو ځل بیا موږ غواړو،چې امارت اسلامي د تېر په څېر راسره مرسته وکړي. د دوا په وېش کې. موږ غواړو،چې د یوې اوونۍ لپاره به کابل کې دا دوا توزیع کړو او بیا د یوې یوې اوونۍ لپاره سفرونه ۳۴ ولایتو ته.»
الکوزی غواړي، ۳۴ ولایتونو ته سفر وکړي او په ټول هېواد کې خپله جوړه کړې دوا په وړیا توګه ووېشي.
دی وایي،داځل یې په کافي اندازه دارو جوړ کړي او کولی شي،ټولو هېوادوالو ته یې ورسوي.
د حکیم نور ملګري بیا وايي، اسلامي امارت دې یو کنفراس جوړ کړي او حکیم دې وپوښتي،چې دوا یې څنګه جوړه کړې او په دې تړاو دې ترې ټولې طبي پوښتنې هم وکړي.
د حکیم محمد الکوزی همکار ډاکتر معین ګل څمکنی وايي:« پر لوړه دولتي کچه باید یو کنفرانس او یا د یوې مشورې په ترڅ کې الکوزی صیب وغوښتل شي. ترې و دې پوښتل شي او الکوزی چمتو دی،چې ځواب ورکړي.»
د عامې روغتیا وزارت ویاند وویل، په دې اړه به خپل نظر له وزیر او مرستیالانو سره تر مشورې وروسته له رسنیو سره شریک کړي.
