سید محمد چې د کونړ نورګل ولسوالۍ مزار درې اوسېدونکی دی او د تېرو زلزلو له امله یې کور ویجاړ شوی، اوسمهال د زلزله ځپلو په لنډمهاله مېشت غالي یا کمپ کې اوسېږي.
دی وايي، د تېرو زلزلو له امله یې د کورنۍ غړي په رواني ناروغیو اخته شوي دي. هغه د خپلې کورنۍ د غړیو کیسه کوي او وايي، اوس هم د شپې ناوخته په غیر شعوري ډول چغې وهي او د زلزلې ډار احساسوي.
د زلزلې له امله زیانمن شوی سید محمد وايي: « ماشومان مې د شپې ناوخته له خوبه پاځي، چغې وهي چې پلاره زلزله ده، هله چې له کوټې لاندې کېږو. کله چې په کمپ کې کوم موټر هم چالان شي یا حرکت وکړي، زما ماشومان د وېرې احساس کوي.»
د ده په خبره، داسې وحشتناکه او قوي زلزله یې نه وه لیدلې او زیاتوي چې د تېرې زلزلې له امله په دې لنډمهاله کمپ کې پرات نږدې ټول خلک له رواني ستونزو کړیږي.
سید محمد په دې اړه زیاتوي: « زله له ۴۵ تر ۵۰ کالو عمر لرم. دا ډول زلزله او عذاب ما کله هم نه و لیدلی. یوه لور مې اوس هم روغتون کې بستر ده، که څه هم خوږ شوې نه ده، خو سخته وېرېږي او دماغي تکلیف ورته پيدا شوی.»
په همدې حال کې د رواني ناروغیو متخصصین وايي، د طبعي افتونو له پېښېدو وروسته زیانمنو شويو خلکو کې د رواني ناروغیو د پیدا کېدو چانس ډېر وي. د دوی په خبره، اوس باید د کونړ زلزله ځپلو کمپونو کې د رواني روغتیا ځانګړي مرکزونه فعال شي.
د رواني ناروغیو متخصص توریالی احساس وايي: « کونړ کې چې کوم کلینیکونه جوړ شوي، باید کارکوونکو ته یې د رواني ناروغیو په اړه روزنه ورکړل شي. موږ په دې برخه کې همکار یو او غواړو چې د دولت په همکارۍ دغه روزنه ورکړو، ترڅو زلزله ځپلي له رواني حالت څخه را و ایستل شي.»
دا په داسې حال کې ده چې په کونړ کې د زلزله ځپلو لپاره په جوړ شویو لنډمهاله مېشت غالو کې د نورو ناروغیو د درملنې له مرکزونو سربیره، د حکومت او مرستندویه روغتیايي موسسو له لوري د رواني روغتیا مرکزونه هم فعال شوي دي.
