هلمند کې د جاپان د خلکو له خوا پر نشه یي توکو د روږدو کسانو۳۰۰ کورنیو ته د خوراکي توکو مرستې ووېشل شوې.
په نشه يي توکو د روږدو کسانو(معتادانو) د ۱۰۰ بستریز روغتون مسوولین وایي، دا مرستې د هغو کسانو د دوامداره ملاتړ په موخه شوې دي چې د حکومت له لوري یې درملنه شوې او اوس له روغتیا برخمن دي.
د معتادینو د درملنې روغتون آمر علاالدین احسان وايي: « نن ورځ موږ ۲۹۲ تنو ته خوراکي مواد وېشو. په دې موادو کې دوې ګونۍ اوړه، ۱۵ لېټره غوړي، دوې ګونۍ دال او دوه پاکټه مالګه شامل دي. همدارنګه دا مهال له موږ سره ۱۲۶ کسان په حرفوي زده کړو بوخت دي.»
د یاد روغتون د مسوولینو په خبره، د درملنې ترڅنګ ۱۲۶ معتادینو ته د حرفوي زده کړو زمینه هم برابره شوې، ترڅو هغوی وکولی شي راتلونکي کې د خپلو کورنیو لپاره د حلالې روزۍ سرچینه پيدا کړي.
له نشه يي توکو یو شمېر رغېدلي کسان وایي، د درملنې ترڅنګ یې د موټرسايکل جوړونې او سولري برېښنا په برخو کې مسلکي زده کړې هم ترلاسه کړې دي.
هلمند کې له نشه يي توکو کارونې رغېدلی نظر محمد وايي: « زه د تریاکو په کارولو روږدی وم، اوس زما درملنه شوې او په مسلکي زده کړو بوخت یم.»
له نشه يي توکو رغېدلی محمد ظاهر وايي: « ما دوه کال ټابلېټ که(K) ګولۍ خوړلې او چرس مې څکول. کله چې زه دلته راغلم، ایله په ژوند پوه شوم. زه له خپلې روغتیا او ډاکټرانو څخه ډېر خوښ یم.»
بله خوا، د دغو کسانو د کورنیو غړي وایي، د خپلو اولادونو د راتلونکي په اړه هیله من شوي او په دې خوښ دي چې هغوی یوازې له اعتیاد نه دي رغېدلي بلکې د کسبونو د زده کړې له لارې د یوه نوي ژوند پیلولو هم جوګه شوي دي.
د خالق دادا په نوم له نشه يي توکو د یوه رغېدلي کس پلار وايي: « زما زوی معتاد و او یوه یا یوه نیمه میاشت کېږي چې دلته بستر دی او د لمریزې برېښنا او سولر سیسټم په برخه کې حرفوي زده کړې ورکول کېږي. اوس شکر دی د نشه يي توکو له کارولو څخه خلاص شوی.»
د یوه بل رغېدلي کس د کورنۍ غړی محمد خان وايي: « زما د ماما زوی په نشه يي توکو معتاد و. لور یا بېلچه به ورسره او کور به یې هېڅوک آرام نه پرېښودل. اوس مې دلته راوستی او بستر کړی دی.»
په نشه يي توکو د روږدو کسانو د درملنې ۱۰۰ بستریز روغتون د مسوولینو په وینا، په دې روغتون کې دا مهال ۱۰۰ تنه معتادان تر درملنې لاندې دي او یوازې د روان کال په جریان کې نه یوازې د ۷۰۰ تنو درملنه شوې بلکې حرفه هم ورښودل شوې ده.
