عامې روغتیا وزارت دوشنبه(د وږي ۳۱ مه) د خبرپاڼې په خپرولو سره د روغتیا نړیوال سازمان وروستی راپور رد کړ. په خبرپاڼه کې ویل شوي، په دې وروستیو کې د روغتیا نړیوال سازمان له خوا د زړه او مزمنو غیر ساري ناروغیو اړوند خپاره شوي معلومات او ارقام نا سم دي او له دوی سره شته ارقام د سازمان له خوا ادعا شویو شمېرو په پرتله څو ځلې کم دي.
د روغتیا وزارت ویاند ډاکټر شرافت زمان وايي، د روغتیا نړیوال سازمان په راپور کې ویل شوي چې شاوخوا ۴۰ زره افغانان هر کال د زړه او غیرساري ناروغیو له امله خپل ژوند له لاسه ورکوي. د روغتیا نړیوال سازمان راپور دغه راز څرګندوي چې له هرو ۵ افغانانو ۱ تن رواني ستونزې لري.
خو د عامې روغتیا وزارت ویاند وايي، د دوی د معلوماتو او شته شمېرو له مخې، خپاره شوي ارقام دقیق او کره ارقام نه دي او د عامې روغتیا وزارت سره شته ارقام له دې څخه څو ځلې لږ دي.
د عامې روغتیا وزارت ویاند شرافت زمان زیاتوي: « البته په عمومي ډول باید ووایو ځینې ارقام چې خپرېږي، اټکل شوي ارقام وي. څومره چې موږ معلومات وکړل، د روغتیا نړیوال سازمان ارقام هم تخمیني دي، د کومې کره سروې یا معلوماتو او ارقامو په اساس نه دي. د عامې روغتیا وزارت دا ارقام او راپور ردوي او له ټولو نړیوالو ادارو هیله کوي چې د عامې روغتیا وزارت د تدوین شوې پالیسۍ له مخې هغه ارقام چې دوی یې په افغانستان کې د ناروغیو یا هم ناروغانو په اړه خپروي، باید یې له عامې روغتیا وزارت سره په همغږۍ خپاره کړي؛ ترڅو د ناسمو او نا بشپړو شویو معلوماتو له خپرولو څخه مخنیوی وکړو.»
د روغتیا نړیوال سازمان په یو تازه خپاره کړي راپور کې دغه راز ویلي، په افغانستان کې د ټولو مړینو د ۴۳ سلنې علتونه د زړه ناروغۍ، شکر، سرطان او د سږو مزمنې ستونزې دي.
دغه سازمان وړاندوېینه کوي چې تر ۲۰۳۰ کاله به دا شمېر۶۰ سلنې ته لوړ شي او ډېری قربانیان به ښځې وي.
د روغتیا نړیوال سازمان د افغان ښځو په منځ کې د سینې او د رحم خولې سرطان د ډېرېدو په اړه هم خبرداری ورکړی او وايي چې دا دواړه د هېواد له درې تر ټولو عامو سرطانونو څخه دي.
دغه سازمان همدارنګه ویلي، په افغانستان کې د رواني ناروغیو شمېر هم مخ په زیاتېدو دی.
د روغتیا نړیوال سازمان ویلي: « موږ په افغاستان کې د خلکو رواني ستونزو هم سخت اندېښمن کړې یوو؛ ځکه دلته کلونه جګړو، طبیعي پېښو او بې کوره کېدنو د افغانانو پر رواني وضعیت ژور اغېز کړی.»
د راپور له مخې، له هرو پنځو افغانانو یو د رواني روغتیا ستونزې لري او سره له دې دومره ډېرې اړتیا، د افغانستان ډېری ولایتي روغتونونه او لومړني روغتیايي مرکزونه د رواني روغتیا خدمتونه نه لري او زیات شمېر زیانګالي خلک بې درملنې پاتې کېږي.
