هرات کې دا ځل د ماشومانو له فلج یا ګوزڼ سره د مبارزې په موخه د واکسین کمپاین، تر ډېره تازه راستنو شویو ته ځانګړی شوی.
د پولیو دا واکسین چې نن دوشنبه پيل کېږي، د هرات ښار اړوند ناحیو او انجیل ولسوالۍ کې به ترسره شي.
د عامې روغتیا چارواکي وايي، کمپاین کې به څه باندې ۲۷۷ زره له پنځو کالو کوچنیو ماشومانو ته د پولیو څاڅکي ورکړل شي.
د هرات عامې روغتیا مرستیال غلام محمد حنیفي وايي: « له وړاندې چمتو شوي پلان له مخې، د پولیو محوه کولو کمپاین دا ځل په هرات ښار او انجیل ولسوالۍ کې ترسره کېږي چې له دوشنبې تر پنجشنبې ورځې به ادامه ولري.»
مسوولین وایي، هېواد ته د کډوالو له طریقه د پولیو ویروس انتقالېدو د مخنیوي په موخه د واکسین روغتیایي ټیمونه هم ګومارل شوي دي.
د هرات کډوالو او راستنېدنکو چارو ریاست د کډوالو حقونو ملاتړ مسلکي غړی امرالله حبیبي وايي: « موږ خلکو ته د پولیو واکسین په اړه عامه پوهاوی ورکړی او هره ورځ له زرو تر یونیم زرو کورنیو راځي زموږ دفتر ته او دلته راجسټر کېږي.»
د هرات حج او اقافو ریاست د جوماتونو عمومي مدیر محمد شعیب حیدري وايي: « د موضوع په تړاو له جوماتونو تبلیغ شوی او ټولو خلکو ته مالومات ورکړل شوي چې باید خپل له پنځو کالو کوچني ماشومان حتمن واکسین کړي، ترڅو راتلونکي کې له ناروغیو خوندي شي.»
خلک هم له ګوزڼ سره پر جدي مبارزې ټینګار کوي او له کورنیو غواړي چې له پنځو کالو ټیټ عمر لرونکي ماشومان واکسین کړي.
د هرات اوسېدونکی محمد عارف وايي: « د پولیو واکسین ډېر ګتور دی، که تر پنځو کالو کوچني ماشومان واکسین شي، نو روغ پاتې کېږي کنه، شاید فلج او معیوب شي.»
د هرات بل اوسېدونکی سید رحیم وايي: « د پولیو واکسین ډېر مهم او اړین دی، باید ټول کوچنیان واکسین شي. که ماشومان واکسین نه شي، راتلونکي کې د فلج کېدو او په نورو ناروغیو د اخته کېدو امکان یې ډېر وي. زه له ټولو کورنیو غواړم چې خپل ماشومان واکسین کړي.»
هرات کې دا ځل د پولیو واکسین داسې مهال پيل کېږي چې له نورو هېوادونو د راستنېدونکو افغانانو سره د دې ویروس د انتقال وېرې ډېرې شوې دي، خو مسوولین وايي، دغو اندېښنو ته متوجه دي او پر وړاندې یې جدي مبارزه کوي.
