د بلخ ولایت حوزوي روغتون کې د پوستکي ناروغیو درملنې څانګې مسوولین وايي، وروستیو کې په جلدي ناروغیو زیات اخته ناروغان ورته مراجعه کوي.
ډاکټران وایي، د تېرکال پرتله په دې ولایت کې د جلدي یا پوستکي ناروغي ۳۰ سلنه زیاته شوې ده.
د یاد روغتون د جلدي برخې ډاکټرانو په وینا، یوازې د روان ۱۴۰۴ لمریز کال په لومړیو ۳ میاشتو کې څه باندې ۱۲زره په بېلابېلو جلدي ناروغیو اخته کسانو یاد روغتون ته مراجعه کړې، حال دا چې دغه شمېر په ټول ۱۴۰۳ کال کې ۴۶ زره کسانو ته رسېده.
د بلخ حوزوي روغتون د پوستکي ناروغیو څانګې مشر ډاکټرعلي اصغرملک وايي: « موږ د خپلو شمېرو له مخې ویلی شو چې په تېرو درېیو میاشتو کې مو تقریبا ً ۱۲ زره ۴۰۰ تنو ناروغانو درملنه کړې. دا شمېر د تېر کال د همدې وخت پرتله ۳۰ سلنه زیاتوالی ښيي.»
روغتیاپالان د هوا د تودوخې لوړه کچه، ککړ چاپېریال، د پاکوالي او نظافت نه رعایتول، ناسم خواړه، رواني فشارونه او بهر هېوادونو ته کډوالي د دې ناروغۍ د خپرېدو او پراختیا لاملونه بولي.
ډاکټر علي اصغر ملک په دې اړه وايي: « دا چې ولې جلدي ناروغۍ او ناروغان زیاتېږي، دا ستونزه په مختلفو عناصرو پورې اړه لري. د مثال په توګه ناسمه حفظ الصحه، د ښارونو په داخل کې د نفوسو زیاتوالی، مهاجرتونه او بهرنیو هېوادونو څخه د مهاجرو راتګ هغه عوامل دي چې له ځانه سره جلدي ناروغۍ خپروي.»
بله خوا، یو شمېر ناروغان د دې ناروغۍ د مخنیوي برخه کې له روغتیایي مسوولینو د عامه پوهاوي غوښتنه کوي.
د جواد په نوم په جلدي ناروغۍ اخته کس وايي: « څلور ورځې کېږي چې په دې ناروغۍ اخته شوی یم. دلته بلخ حوزوي روغتون ته راغلی یم او بستر شوم. زه له ډاکټرانو راضي یم، دوی له موږ سره ښه چلن کوي.»
جلدي ناروغ حجت الله وايي: « پنځه کاله کېږي چې د مخ له ناحیې په جلدي ناروغۍ اخته یم، خو تر اوسه پورې ډاکټر ته نه یم تللی. اوس دلته په بلخ روغتون کې تر درملنې لاندې یم.»
د بلخ حوزوي روغتون د ۹ شمالي او شمال ختیځو ولایتونو پر کچه یو له لویو روغتونونو دی چې دا مهال د ۸۵۰ ناروغانو د بستر ظرفیت لري.
