د روغتیا نړیوال سازمان هر کال د وینې ورکوونکو نړيواله ورځ د دې لپاره نمانځي چې اړمنو ته د وینې ورکړې په اړه د عامه پوهاوي کچه لوړه شي.
په افغانستان کې د روغتیا نړیوال سازمان استازی په هېواد کې د وینې ورکوونکو درناوي ترڅنګ وايي، ناروغانو ته د وینې هر څاڅکي ورکړه کولی شي د دوی ژوند وژغوري او دغه کار په افغانستان د روغتیا لپاره ګټور تمامیدای شي.
دغه سازمان « د یو ځل وینې په ورکړې سره کولی شئ د درېیو کسانو ژوند وژغورئ» تر سرلیک لاندې شعار سره خلک هڅوي چې د ناروغانو د ژوند ژغورلو لپاره وینه ورکړي.
په افغانستان کې د روغتيا نړيوالو سازمان استازی اډوين سينيزا سلواډور وايي: « د وینې ورکوونکو په نړیواله ورځ موږ د هغو افغانانو درناوی کوو چې په بې غرضه توګه وينه د ژوند دويم چانس لپاره نورو ته ورکوي. د وينې هر څاڅکی د اړمنو د ژغورلو لار ده او په دې اړه د خواخوږۍ هر ګام د افغانستان له سلامتۍ سره مرسته کوي.»
د عامې روغتیا وزارت ویاند شرافت زمان امرخیل که څه هم وینې ته د اړمنو افغانانو شمېر نه ښيي، خو د وینې په ټولو بانکونو کې د امکانانو برابرولو ډاډ ورکوي.
زمان په دې اړه وايي: « د عامه پوهاوي ترڅنګ په مرکز او ولایتونو کې د وینې بانکونو ظرفیت لوړ شوی او څومره چې اړتیا وه، نوي وسایل اخیستل شوي دي. موږ هڅه کوو د عامه پوهاوي له لارې د وینې ورکولو فرهنګ عام کړو. له ټولو خلکو او په ځانګړې توګه ځوانانو هیله لرو چې د درېیو یا حد اقل شپږو میاشتو په جریان کې د وینې بانکونو ته ورشي او د خپلې وینې په اهدا کولو سره وینې ته د اړمنو ناروغانو ژوند وژغوري.»
په ورته وخت کې یو شمېر ډاکټران په ناروغانو کې د وینې کموالي او اړتیا عمده لامل په بدن کې د ویټامینونو او اوسپنې کموالی یادوي او زیاتوي چې دغه ستونزه تر ډېره ښځو او ماشومانو کې پیدا کیږي.
ډاکټر عبدالرزاق احمدزی وايي: « په عمومي توګه که ووایم چې د وینې کمښت د کومو لاملونو له امله پیدا کېږي، په ښځو او ماشومانو کې د دې ناروغۍ د پیدایښت لامل د هغوی په بدن کې د هغو خاصو موادو کمبود دی چې په بدن کې اوسپنه تولیدوي، یانې دا چې د دوی په بدن کې اوسپنه کمه ده. په دویم ګام کې د وینې کمېدو لامل په بدن کې د بي ۱۲ او نورو ویټامینونو کمښت دی.»
د ۲۰۰۴ زېږدیز کال راهیسې د روغتیا نړیوال سازمان د وینې لېږد نړیوالې ټولنې، سرې میاشتې او سره صلیب نړیوالې ټولنې او د وینې ورکوونکو نړیوالو سازمانونو ټولنې له خوا د جون ۱۴ مه د وینې ورکوونکو نړیوالې ورځ په نوم نومولې ده.
