که هم د روغتیا نړیوال سازمان له خوا هر کال د ګوزڼ )پولیو( ناروغۍ له منځه وړلو لپاره میلیونونه ډالر لګول کېږي، خو بیا هم دغه ویروس په بشپړ ډول له منځه نه دی تللی او د ماشومانو ژوند ته یو جدي ګواښ ګڼل کېږي.
د ننګرهارعامې روغتیا ریاست مسوولین کډوالي، جګړې، بېوزلي او د پاکۍ نه مراعتول د ګوزڼ د لا موجودیت لاملونه ګڼي.
د ننګرهار عامې روغتیا رییس امین الله شریف وايي: « جنګونه دي، غربت دی، مسکینیت دی او بله دا چې زموږ سیمه داسې نه ده عیاره شوې او داسې سیسټمونه نه لري لکه نورو هېوادونو کې چې دي. تاسو زموږ لارې، کوڅې او تشنابونه وګورئ، هغسې نه دي لکه د نورې نړۍ. نو دلته به خامخا ستونزې وي. همدارنګه په راستنېدونکو کډوالو کې د پولیو ناروغي زیاته ده، ځکه هغوی ته واکسین نه دی ورکړل شوی.»
خو د پولیو د برخې کار کوونکي او عام خلک بیا د پولیو ویروس د پاتې کېدو لامل د پولیو واکسین په تړاو د خکو ناسم برداشت، نظریات او عقیدوي مسایل یادوي.
دوی وايي، اوس هم اکثره خلک د پولیو د واکسین په تړاو بېلابېل شکونه لري او ټینګار کوي چې په دې برخه کې دې خلکو ته عامه پوهاوی زیات او لرې پرتو سیمو کې د خلکو ذهنونه روښانه شي.
د پولیو د برخې نظارت کوونکی عبدالرووف وايي: « ځینې وايي واکسین حرام دی، ځینې وايي ګټه نه لري او ځینې بیا وايي چې ماشومانو ته نورې بېلابېلې ناورغۍ پيدا کوي. دوی ته عامه پوهاوی نه دی ورکړل شوی. موږ له مسوولو ادارو غوښتنه کوو چې عام ولس ته ډېر پوهاوی ورکړي، ترڅو دا شکونه او ابهامات له خلکو لرې شي.»
د ننګرهار اوسیدونکی شباب وايي: « خلک د پولیو واکسین ته د کفارو د درملو په سترګه ګوري. په لرې پرتو سیمو کې عامه پوهاوی نه دی شوی، د دې ناورغۍ پېښې په کې ډېرې وي. په کار ده چې هلته هم عامه پوهاوی وشي.»
روغتیايي مسولین بیا وايي، اوس مهال د پولیو واکسین برخه کې د دوی د هدف وړ ماشومانو تعداد پورته شوی او ټولو هغو سیمو ته واکسین رسیږي چې پخوا به د نا امنیو له امله ورته لاسرسی نه کېده.
دوی د پولیو په له منځه وړلو کې د علماوو او قومي مشرانو پر ونډې ټینګار کوي.
د ننګرهار دعامې روغتیا رییس امین الله شریف وايي: « موږ پخوانی هدف شاوخوا ۸۷۰ زرو ماشومانو ته د واکسین رسول وو، خو اوس دغه هدف ۹۵۰ زرو ته پورته شوی. دا زموږ د ادارې او خلکو ژمنه ښيي. که ولس، مخور کسان، علما او ادارې سره لاس یو نه کړي، د پولیو وحشي ناورغي نه شي ورکېدای.»
مسوولین دغه څرګندونې داسې مهال کوي چې په ټول افغانستان کې د پولیو واکسین نوی کمپاین د دوشنبې په ورځ پیل شو او ختیځ زون کې به ۱.۳ میلیونه ماشومانو ته د پولیو ضد واکسین ورسیږي.
